شمالی وزیرستان میں سیکورٹی فورسز کی کارروائیاں، ایک دہشت گرد ہلاک، 2 گرفتار

راولپنڈی + میران شاہ (ک م/نمائندہ ڈیلی اردو) صوبہ خیبر پختونخوا کے قبائلی ضلع شمالی وزیرستان میں سکیورٹی فورسز کے انٹیلی جنس بیسڈ آپریشن کے دوران فائرنگ کے تبادلے میں ایک دہشت گرد ہلاک، دو اہم دہشتگرد گرفتار کر لئے گئے۔

سیکورٹی فورسز نے میرانشاہ اور میرعلی میں دہشتگردوں کیخلاف انٹیلی جنس بیسڈ آپریشن کیا آپریشن کے دوران میرعلی کے علاقہ پنی میں فائرنگ کے تبادلے میں ایک دہشت گرد ہلاک ہو گیا۔

سیکورٹی حکام کے مطابق دوسری بڑی اہم کاروائی میرانشاہ کے علاقہ مرسی خیل میں کی گئی جس کے نتیجے میں کالعدم تحریک طالبان پاکستان (ٹی ٹی پی) کے دو اہم دہشت گرد گرفتار کر لئے گئے۔

گرفتار دہشتگردوں کے قبضے سے اسلحہ، بارود، نقد رقم، افغان سم کارڈ اور دیگر مواصلاتی آلات برآمد ہوئے۔

حکام کے مطابق گرفتار دہشت گردوں سے دوران تفتیش اہم انکشافات اور مزید گرفتاریاں بھی متوقع ہیں۔