شمالی وزیرستان میں شہید کرنل راشد کریم بیگ اور کیپٹن عارف اللہ کی نماز جنازہ ادا

لکی مروت / ہنزہ (ڈیلی اردو) شمالی وزیرستان میں بارودی سرنگ کے دھماکے میں شہید ہونے والے لیفٹیننٹ کرنل راشد کریم بیگ اور کیپٹن عارف اللہ مروت کی نماز جنازہ ادا کردی گئی۔

شمالی وزیرستان دھماکے میں شہید ہونے والے پاک فوج کے افسر لیفٹیننٹ کرنل راشد کریم بیگ کا تعلق ہنزہ کے علاقے کریم آباد سے تھا، ان کی نماز جنازہ جوٹیال میں ادا کی گئی جس میں وزیراعلیٰ گلگت بلتستان سمیت فوجی افسران نے شرکت کی۔

شہید لیفٹیننٹ کرنل راشد کریم بیگ کے جسدِ خاکی کو بذریعہ ہیلی کاپٹر ہنزہ پہنچادیا گیا جہاں سے شہید کی میت کو ایمبولینس کے ذریعے آبائی گاؤں حیدرآباد روانہ کردیا گیا۔ شہید کو پاک فوج کے چوک و چوبند دستے نے سلامی دی اور قبر پر پھول بھی چڑھائے۔

شمالی وزیرستان دھماکے میں شہید ہونے والے دوسرے آفیسر کیپٹن عارف اللہ کا تعلق لکی مروت سے تھا، ان کی نماز جنازہ آبائی گاؤں تاجہ زئی میں ادا کی گئی اور شہید کو پورے سرکاری اعزاز کے ساتھ مقامی قبرستان میں سپرد خاک کیا گیا۔

شہید کیپٹن عارف اللہ کی نماز جنازہ میں اعلیٰ افسران اور لوگوں کی بڑی تعداد نے شرکت کی۔

نماز جنازہ میں ڈی جی او سی میجر جنرل اسد جنجوعہ کے علاوہ ضلع نائب ناظم عرب خان نے بھی شرکت کی۔

شہید کو پاک فوج کے چوک و چوبند دستے نے سلامی دی اور قبر پر پھول بھی چڑھائے۔

واضح رہے کہ گزشتہ روز شمالی وزیرستان میں بارودی سرنگ کے دھماکے میں پاک فوج کے کیپٹن، لیفٹیننٹ کرنل اور میجر سمیت ایک حوالدار کی شہادت ہوئی۔