شمالی وزیرستان میں چوکی پر حملہ، دو پاکستانی فوجی ہلاک

راولپنڈی (نمائندہ ڈیلی اردو) صوبہ خیبر پختونخوا کے قبائلی ضلع شمالی وزیرستان کے علاقے میر علی میں چوکی پر دہشت گردوں کے حملے کے دوران فائرنگ کے تبادلے میں دو فوجی ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق صوبہ خیبر پختونخوا کے قبائلی ضلع شمالی وزیرستان کی تحصیل میرعلی میں دہشت گردوں نے فوجی چیک پوسٹ پر حملہ کیا ہے، جس کے بعد سیکیورٹی فورسز اور دہشتگردوں کے درمیان فائرنگ کا تبادلہ ہوا۔

فائرنگ کے تبادلے میں پاکستانی فوج کے دو اہلکار 20 سالہ سپاہی ظہور خان، اور 23 سالہ سپاہی رحیم گل ہلاک ہوگئے۔ سیکیورٹی فورسز نے فوری جوابی کارروائی کرتے ہوئے دہشت گردوں کو نشانہ بنایا۔

آئی ایس پی آر کے مطابق پاک فوج کی جانب سے علاقے میں کلیئرنس آپریشن جاری ہے۔