شمالی کوریا نے نئے جوہری ایندھن پلانٹ کی نقاب کشائی کر دی

پیانگ یانگ (ڈیلی اردو) شمالی کوریا نے جمعرات کے روز جوہری ہتھیاروں کے لیے درکار اعلیٰ درجے کا یورینیم تیار کرنے والی ایک نئی تنصیب گاہ کی نقاب کشائی کر دی، جبکہ ملکی رہنما کم جونگ اُن نے کمیونسٹ کوریا کی جوہری صلاحیتوں کو ’’غیر معمولی رفتار‘‘ سے بڑھانے کے عزم کا اظہار کیا ہے۔

شمالی کوریا کی سرکاری نیوز ایجنسی کے سی این اے کے مطابق یہ نئی سائٹ ’’زیادہ جدید ٹیکنالوجی‘‘ سے لیس ہے، تاہم اس کی مزید تفصیلات فراہم نہیں کی گئیں۔ یہ بھی واضح نہیں کیا گیا کہ یہ پلانٹ کب سے کام کر رہا ہے یا یہ کس مقام پر واقع ہے۔

کے سی این اے کی جانب سے جاری کردہ تصاویر میں ایک ایسے ہال کو دکھایا گیا ہے، جس میں سینٹری فیوج مشینیں نصب نظر آتی ہیں۔ ماہرین کے مطابق یہ پہلو اس بات کی نشاندہی کرتا ہے کہ یہ تنصیب گاہ ممکنہ طور پر ہتھیاروں کے معیار کے یورینیم کی افزودگی کے لیے استعمال کی جا رہی ہے۔

سرکاری خبر رساں ادارے نے کم جونگ اُن کے حوالے سے بتایا کہ ملک کو اپنے جوہری ہتھیاروں کی صلاحیت میں اضافے کی فوری ضرورت ہے تاکہ ’’انتہائی جارح دشمنوں‘‘ کے خلاف مؤثر دفاعی طاقت برقرار رکھی جا سکے۔

کم جونگ اُن نے دعویٰ کیا کہ گزشتہ پانچ برسوں کے دوران شمالی کوریا کی ہتھیاروں کے معیار کے یورینیم کی پیداواری صلاحیت دگنی سے زیادہ ہو چکی ہے۔

اس پلانٹ کے دورے کے دوران اعلیٰ حکام سے ملاقات کے بعد کم جونگ اُن نے کہا کہ انہوں نے ایک ایسے مستقبل کے منصوبے کی ترجیحات کا جائزہ لیا ہے، جس کا مقصد ملک کی جوہری قوت کو ’’غیر معمولی شرح‘‘ سے مضبوط بنانا ہے۔

واضح رہے کہ شمالی کوریا اپنے جوہری پروگرام اور بیلسٹک میزائل ٹیکنالوجی کی وجہ سے برسوں سے بین الاقوامی پابندیوں کا سامنا کر رہا ہے، تاہم پیونگ یانگ متعدد مواقع پر ان پابندیوں کو نظر انداز کرتے ہوئے اپنے عسکری پروگرام کو آگے بڑھاتا رہا ہے۔