صنعاء : یمن آئل کمپنی کے ڈپو پر فضائی حملے، سعودی عرب نے کارروائی سے قبل شہریوں کو انخلا کی ہدایت دی تھی

صنعاء(ڈیلی اردو) یمن کے دارالحکومت صنعاء میں یمن آئل کمپنی کے مرکزی ڈپو پر فضائی حملوں کی اطلاعات سامنے آئی ہیں۔ اسکائی نیوز عربیہ کے مطابق حوثی باغیوں کے زیر انتظام ذرائع ابلاغ نے دعویٰ کیا ہے کہ سعودی فضائی حملوں میں دارالحکومت کے مغربی علاقے صباحہ میں واقع آئل کمپنی کے مقام کو نشانہ بنایا گیا۔ تاہم حملوں میں ہونے والے جانی و مالی نقصان کی تفصیلات فوری طور پر سامنے نہیں آئیں۔

حملوں سے قبل سعودی وزارتِ دفاع کے ترجمان میجر جنرل ترکی المالکی نے صنعاء میں یمن آئل کمپنی کے مرکزی اسٹیشن ’’الصباحہ‘‘ کے مخصوص مقام کو خالی کرنے کی ہدایت جاری کی تھی۔ سعودی حکام کے مطابق یہ اقدام ایک خصوصی کارروائی سے قبل شہریوں کی حفاظت کے لیے کیا گیا۔ دوسری جانب حوثی فوجی ترجمان نے دعویٰ کیا کہ حملوں کا نشانہ بننے والا آئل اسٹیشن پٹرولیم مصنوعات سے خالی تھا۔

یہ پیش رفت سعودی عرب اور حوثی باغیوں کے درمیان بڑھتی ہوئی کشیدگی کے تناظر میں سامنے آئی ہے۔ اسکائی نیوز عربیہ نے خبر رساں ادارے رائٹرز کے حوالے سے بتایا کہ حوثی باغیوں نے سعودی تیل کمپنی آرامکو کی تنصیبات کے قریب موجود ملازمین اور شہریوں کو بھی وہاں سے نکل جانے کی ہدایت دی ہے۔ اس سے قبل سعودی عرب نے ریاض کی جانب داغے گئے حوثی بیلسٹک میزائل کو روک کر تباہ کرنے کا اعلان کیا تھا، جبکہ سعودی حکام نے شاہ خالد بین الاقوامی ہوائی اڈے پر حملے کے بعد سخت ردعمل کا عندیہ بھی دیا تھا۔