عالمی قانون کے تحت آبنائے ہرمز بند نہیں کی جا سکتی، اقوام متحدہ

نیو یارک (ڈیلی اردو) اقوام متحدہ کے تحت عالمی بحری جہاز رانی کی حفاظت کے ذمہ دار ادارے عالمی بحری تنظیم (آئی ایم او) کے سربراہ نے کہا ہے کہ کسی بھی ملک کو قانونی طور پر آبنائے ہرمز کی ناکہ بندی کا حق حاصل نہیں۔

آئی ایم او کے سیکریٹری جنرل آرسینیو دومینگیز نے لندن میں تنظیم کے ہیڈکوارٹر میں بریفنگ دیتے ہوئے کہا کہ اگرچہ امریکی اقدام کا مقصد بظاہر ایرانی بندرگاہوں تک رسائی محدود کرنا ہے، تاہم بین الاقوامی قانون کے تحت کسی بھی ملک کو عالمی جہاز رانی کے لیے استعمال ہونے والی آبی گزرگاہ کو بند کرنے کا اختیار حاصل نہیں۔

ان کا کہنا تھا کہ امریکی ناکہ بندی سے قبل بھی آبنائے ہرمز سے گزرنے والے جہازوں کی تعداد کم ہو چکی تھی، تاہم تازہ پابندیاں موجودہ بحران کا کوئی حل پیش نہیں کرتیں۔

دوسری جانب انتونیو گوتریس نے امریکہ اور ایران سے مذاکرات دوبارہ شروع کرنے کی اپیل کی ہے۔ انہوں نے کہا کہ جاری کشیدگی کا کوئی فوجی حل موجود نہیں اور جنگ بندی ہر صورت برقرار رہنی چاہیے۔

انتونیو گوتریس نے تمام فریقین پر زور دیا کہ وہ خلاف ورزیوں کا خاتمہ کریں اور کسی معاہدے تک پہنچنے کے لیے فوری طور پر مذاکرات کا آغاز کریں۔