غزہ سٹی میں اسرائیلی افواج کی پیش قدمی، مزید 20 فلسطینی ہلاک

غزہ (ڈیلی اردو/ نیوز ایجنسیاں)  اسرائیلی افواج بدھ کو غزہ سٹی کے مرکز کی جانب بڑھیں، جس سے ان ہزاروں فلسطینیوں کی زندگیاں خطرے میں پڑ گئیں ہیں، جو جنگ بندی کی امید پر اپنے گھروں میں ٹھہرے ہوئے تھے۔

امریکی صدر ڈونلڈ ٹرمپ نے منگل کو نیویارک میں اقوام متحدہ کے اجلاس کے موقع پر مسلم ممالک کے رہنماؤں سے ملاقات کی، جس کا محور غزہ کی جنگ کے خاتمے پر بات چیت تھا۔ انہوں نے کہا کہ وہ جلد اسرائیلی قیادت سے ملیں گے۔

ادھر غزہ کے طبی ذرائع کا کہنا ہے کہ ایک پناہ گاہ پر اسرائیلی فضائی حملے میں کم از کم بیس افراد ہلاک اور متعدد زخمی ہوئے ہیں۔

غزہ کے شمال سے لاکھوں افراد جنوبی علاقوں کی طرف نکل چکے ہیں لیکن شہریوں کی بڑی تعداد اب بھی یہ کہہ کر رکی ہوئی ہے کہ ’’کہیں بھی کوئی محفوظ جگہ موجود نہیں ہے۔‘‘

 بدھ کو مزید سات افراد جنوبی غزہ میں نُصیرا اور رفح کے قریب مارے گئے۔ غزہ جنگ میں اب تک مقامی حکام کے مطابق 65  ہزار سے زائد فلسطینی ہلاک ہو چکے ہیں، جن میں اکثریت عام شہریوں کی ہے، جبکہ غزہ پٹی کے کئی علاقے قحط کی زد میں ہیں۔