غزہ فلوٹیلا: اسرائیلی بحریہ نے زیادہ تر کشتیاں روک لیں، 250 کارکن گرفتار

یروشلم (ڈیلی اردو) اسرائیلی پبلک براڈکاسٹر ’کان‘ نے منگل 19 مئی کے روز بتایا کہ اسرائیلی بحریہ کے دستوں نے غزہ پٹی کی طرف سفر کرنے والے امدادی قافلے میں شامل زیادہ تر کشتیوں کو قبرص کے ساحلوں سے کچھ دور سمندری علاقے میں روک لیا۔

جنگ زدہ غزہ پٹی کی طرف محو سفر اس امدادی قافلے کا نام غزہ صمود فلوٹیلا ہے اور اسرائیلی بحریہ نے اس فلوٹیلا کے خلاف اپنی کارروائیاں پیر اور منگل کی درمیانی رات بھی جاری رکھیں۔

’کان‘ کی رپورٹوں کے مطابق گزشتہ رات کی جانے والی کارروائیوں کے دوران اس قافلے میں شامل کُل 57 امدادی کشتیوں میں سے نصف سے زائد کو اسرائیلی بحریہ نے اپنے قبضے میں لے لیا۔

ساتھ ہی یہ بھی بتایا گیا کہ اس پریشن کے دوران، جو جزیرہ ریاست قبرص سے مغرب کی طرف سمندری علاقے میں کیا گیا، قبضے میں لی گئی درجنوں کشتیوں پر سوار تقریباﹰ 250 کارکنوں کو گرفتار بھی کر لیا گیا۔

اس کارروائی کے بعد غزہ فلوٹیلا کی منتظم تنظیم گلوبل صمود فلوٹیلا کی ویب سائٹ پر جاری کردہ ایک بیان میں کہا گیا کہ اس امدادی قافلے کے خلاف غزہ پٹی سے تقریباﹰ 250 سمندری میل کے فاصلے پر کی جانے والی اسرائیل کی کارروائی ’’بین الاقوامی سمندری پانیوں میں کی جانے والی ایک اور غیر قانونی جارحیت‘‘ ہے۔

اس الزام کے برعکس اسرائیلی وزارت خارجہ نے اپنے ایک بیان میں کہا کہ اس قافلے میں شامل جن کشتیوں کو قبضے میں لیا گیا، ان پر انسانی ہمدردی کی بنیاد پر مہیا کیے جانے کے لیے لادا گیا کوئی امدادی سامان نہیں تھا۔

غزہ صمود فلوٹیلا کا مقصد اسرائیل کی طرف سے اس تباہ شدہ فلسطینی علاقے کی بحری ناکہ بندی کو توڑتے ہوئے ’’غزہ پٹی تک ایک ہیومینیٹیرین کوریڈور‘ قائم کرنا تھا۔