غزہ میں اسرائیلی حملوں میں 22 فلسطینی ہلاک، مائیکروسافٹ سروسز معطل

غزہ (ڈیلی اردو) غزہ کی سول ڈیفنس ایجنسی نے کہا  ہے کہ جمعے کو اسرائیلی فوج کے فضائی اور زمینی حملوں میں مزید 22 فلسطینی ہلاک ہو گئے، جن میں سے  گیارہ ہلاکتیں غزہ سٹی میں ہوئیں۔ یہ ہلاکتیں ایک ایسے دن ہوئی ہیں، جب اسرائیلی وزیر اعظم بینجمن نیتن یاہو نے اقوام متحدہ کی جنرل اسمبلی سے خطاب میں غزہ میں جنگ جاری رکھنے کا اعلان کیا۔

اسرائیلی فوج نے ایک بیان میں کہا کہ گزشتہ 24 گھنٹوں میں غزہ بھر میں 140 سے زائد مقامات کو نشانہ بنایا گیا، جن میں ’’دہشت گرد، سرنگیں اور عسکری ڈھانچے‘‘ شامل ہیں۔ اے ایف پی کی فوٹیج کے مطابق غزہ سٹی کے الشاطی پناہ گزین کیمپ میں عمارتیں شدید نقصان کا شکار ہوئیں ہیں اور لوگ ملبے میں سامان تلاش کرتے نظر آ رہے ہیں۔

ادھر جنوبی غزہ کے علاقے المواسی میں بے گھر ہونے والے فلسطینی بنیادی سہولتوں کی شدید کمی کا سامنا کر رہے ہیں۔

مائیکروسافٹ نے اسرائیلی دفاعی یونٹ کی کلاؤڈ سروسز معطل کر دیں

مائیکروسافٹ نے اعلان کیا کہ اس نے ایک اسرائیلی دفاعی یونٹ کی بعض کلاؤڈ سروسز تک رسائی روک دی ہے جو بظاہر غزہ میں بڑے پیمانے پر نگرانی کے لیے استعمال ہو رہی تھیں۔

یہ اقدام برطانوی اخبار دی گارڈین کی اس رپورٹ کے بعد آیا جس میں دعویٰ کیا گیا تھا کہ اسرائیلی فوج مائیکروسافٹ کے ایژور (Azure) کلاؤڈ پلیٹ فارم کو غزہ اور مغربی کنارے میں شہریوں کی ٹیلی فون کالز کے بڑے پیمانے پر ریکارڈ ذخیرہ کرنے کے لیے استعمال کر رہی ہے۔

مائیکروسافٹ کے صدر بریڈ اسمتھ  کے مطابق ایسے شواہد پائے گئے ہیں جو اس رپورٹ کے کچھ حصوں کی تصدیق کرتے ہیں۔ 

انہوں نے مزید بتایا کہ یہ فیصلہ اسرائیلی وزارت دفاع کے ساتھ مشاورت کے بعد کیا گیا اور اس بات کو یقینی بنانے کے لیے مزید اقدامات اٹھائے جا رہے ہیں کہ مائیکروسافٹ کی ٹیکنالوجی کا غلط استعمال نہ ہو۔

اسمتھ نے یہ بھی واضح کیا کہ اس فیصلے کا اثر اس کام پر نہیں پڑے گا جو مائیکروسافٹ اسرائیل اور مشرق وسطیٰ کے دیگر ممالک کی سائبر سکیورٹی کو مضبوط بنانے کے لیے کر رہا ہے۔