غزہ میں اسرائیلی فضائی حملہ، حماس کے سینئر کمانڈر عزالدین الحداد ہلاک

یروشلم (ڈیلی اردو) غزہ سٹی میں اسرائیلی فضائی حملے کے نتیجے میں حماس کے سینئر عسکری کمانڈر عزالدین الحداد ہلاک ہوگئے، جنھیں اسرائیل نے 7 اکتوبر کے حملوں کے منصوبہ سازوں میں سے ایک قرار دیا تھا۔

اسرائیلی وزیرِ اعظم بنیامن نیتن یاہو اور وزیرِ دفاع اسرائیل کاٹز نے مشترکہ بیان میں کہا کہ الحداد ہزاروں اسرائیلی شہریوں اور اسرائیلی دفاعی افواج کے اہلکاروں کے قتل، اغوا اور زخمی ہونے کے ذمہ دار تھے۔

عینی شاہدین کے مطابق شہر کے وسط میں واقع ایک رہائشی عمارت، جسے ’المعتز‘ کہا جاتا ہے، کو بیک وقت مختلف سمتوں سے داغے گئے تین میزائلوں سے نشانہ بنایا گیا۔ حملے کے بعد عمارت کے قریب ایک گاڑی کو بھی فضائی کارروائی کا نشانہ بنایا گیا۔

ذرائع کے مطابق امدادی ٹیمیں فوری طور پر موقع پر پہنچیں، تاہم زخمیوں اور لاشوں کو نکالنے میں شدید مشکلات کا سامنا کرنا پڑا۔ عینی شاہدین کا کہنا ہے کہ عمارت سے ایک لاش اور متعدد زخمی افراد کو نکالا گیا۔

بعد ازاں ایک دوسری فضائی کارروائی میں اس گاڑی کو نشانہ بنایا گیا جو جائے وقوعہ سے روانہ ہو رہی تھی، جس کے نتیجے میں مزید ہلاکتوں کی اطلاعات ہیں۔ مقامی ذرائع کے مطابق امکان ہے کہ شدید زخمی افراد کو اسی گاڑی کے ذریعے منتقل کیا جا رہا تھا۔

حماس کی جانب سے تاحال اس واقعے پر کوئی باضابطہ ردعمل سامنے نہیں آیا۔ مقامی حکام اور ذرائع کے مطابق صورتحال کی مزید تفصیلات سامنے آ رہی ہیں۔