فرانس: میگزین ‘چارلی ہیبڈو’ کے دفاتر پر حملہ، 4 پاکستانی نژاد نوجوان گرفتار

پیرس (ڈیلی اردو) فرانسیسی انتظامیہ نے ستمبر کے آخر میں معروف فرانسیسی میگزین چارلی ہیبڈو کے سابقہ دفاتر کے باہر چاقو سے حملے کے الزام میں گرفتار پاکستانی نژاد شخص سے مبینہ تعلق کے شبے میں مزید 4 پاکستانی نژاد نوجوان کو گرفتار کر لیا۔

فرانس کے دارالحکومت پیرس میں گستاخانہ خاکے بنانے اور شائع کرنے والے میگزین ‘چارلی ہیبڈو’ کے سابقہ دفاتر کے باہر چاقو کے حملے میں 4 افراد زخمی ہوئے تھے۔

فرانسیسی خبر رساں ایجنسی ‘اے ایف پی’ کے مطابق عدالتی ذرائع نے نام ظاہر نہ کرنے کی شرط پر بتایا کہ ‘پیر کے روز 4 افراد کو حراست میں لیا گیا جن میں سے ایک پر بدھ کو دہشت گردی کی سازش کا الزام عائد کردیا گیا، جبکہ دیگر افراد کو جج کے سامنے پیش کیا جائے گا اور ان پر بھی باضابطہ الزام عائد کیے جانے کا امکان ہے’۔

اے ایف پی کے مطابق نیشنل کاؤنٹر ٹیررازم پراسیکیو نے عدالت کو بتایا ہے کہ گرفتار ہونے والے 4 پاکستانی نژاد نوجوانوں کی عمر 17 سے 21 سال کے درمیان ہے اور انہیں حملہ آور سے رابطے کے شبے میں گرفتار کیا ہے۔

ذرائع نے اخبار لے پاریسین کی رپورٹ کی تصدیق کرتے ہوئے کہا کہ ان افراد پر شبہ ہے کہ انہیں پہلے سے حملہ آور کے منصوبے کا علم تھا اور انہوں نے اسے اس پر اکسایا’۔

Attentat devant les ex-locaux de Charlie Hebdo : 4 nouveaux suspects interpellés, ils sont tous d'origine pakistanaise https://t.co/b96f1krlxv pic.twitter.com/XCap19bQI5

— Fdesouche.com est une revue de presse (@F_Desouche) December 18, 2020

حملہ آور 25 سالہ ظہیر حسان محمود کو حملے کے بعد دہشت گردی کے الزام کے تحت گرفتار کرلیا گیا تھا اور وہ اب بھی زیر حراست ہے۔

French authorities arrest four people of Pakistan origin suspected of links to the meat cleaver attack in late September by a young Pakistani outside the former offices of the Charlie Hebdo weekly that wounded two people.https://t.co/hlsAOYiC22

— Al Arabiya English (@AlArabiya_Eng) December 18, 2020

ان گرفتاریوں کی خبر پیرس کی ایک عدالت کی جانب سے چارلی ہیبڈو کے دفاتر اور مارکیٹ پر جنوری 2015 میں حملہ کرنے والے افراد کے گروپ کے دیگر 14 ساتھیوں کو مالی معاونت اور دہشت گردوں کے نیٹ ورک سے منسلک رہنے سمیت دیگر جرائم کا مرتکب قرار دینے کے دو روز بعد سامنے آئی ہے۔

چارلی ہیبڈو نے ستمبر میں ٹرائل کے آغاز پر دوبارہ گستاخانہ خاکے شائع کیے تھے۔

تین ہفتے بعد ایک پاکستانی شخص نے جریدے کے سابق دفاتر کے باہر حملہ کر کے 4 افراد کو زخمی کردیا تھا۔

16 اکتوبر کو ایک نوجوان چیچن مہاجر نے اپنے طلبا کو گستاخانہ خاکے دکھانے والے ٹیچر سیموئل پیٹی کا سر قلم کردیا تھا۔

بعد ازاں 29 اکتوبر کو حال ہی میں یورپ آنے والے نوجوان تیونسی شخص نے نیس شہر کے گرجا گھر میں چاقو سے حملہ کرکے 3 افراد کو ہلاک کردیا تھا۔

صدر ایمانوئیل میکرون کی حکومت نے شدت پسندی کی کارروائیوں کو روکنے کے لیے قانون سازی متعارف کرائی تھی، جس پر متعدد مسلم ممالک نے غم و غصے کا اظہار کیا تھا۔