قلب حسن سپریم کورٹ بار کے صدر اور شمیم الرحمان ملک سیکرٹری منتخب

لاہور (ڈیلی اردو) سپریم کورٹ بار ایسوسی ایشن کے انتخابات میں قلب حسن صدر اور شمیم الرحمان ملک سیکرٹری منتخب ہوگئے ہیں۔

سپریم کورٹ کے غیر سرکاری نتائج کے مطابق عاصمہ جہانگیر گروپ کے قلب حسن صدر اور حامد خان گروپ کے شمیم الرحمان سیکرٹری بن گئے ہیں۔ قلب حسن نے شعیب شاہین کو جبکہ شمیم الرحمان شمیم نے احمد شہزاد فاروق رانا کو مات دی۔

سپریم کورٹ بار ایسوسی ایشن کے انتخابات میں سابق چیف جسٹس پاکستان تصدق حسین جیلانی، قانون دان حامد خان ،جسٹس ریٹائرڈ ناصرہ اقبال، سابق صوبائی وزیر رانا مشہود سمیت دیگر سینئر وکلاء اور ججز نے ووٹ ڈالے. سپریم کورٹ بار ایسوسی کے حتمی نتائج کا اعلان آئندہ ہفتے کیا جائے گا۔