لاپتا افراد کمیشن کی سربراہی کیلئے سابق سپریم کورٹ جج کی منظوری

اسلام آباد (ڈیلی اردو) نیشنل جوڈیشل کمیٹی نے لاپتا افراد کے کمیشن کی سربراہی کے لیے سپریم کورٹ کے سابق جج کی نامزدگی کی منظوری دے دی۔

چیف جسٹس آف پاکستان کی زیرِ صدارت کمیٹی کا 59 واں اجلاس منعقد ہوا، جس میں فیڈرل شرعی کورٹ اور تمام ہائی کورٹس کے چیف جسٹس صاحبان کے علاوہ اٹارنی جنرل نے بھی شرکت کی۔ 

اعلامیے کے مطابق اٹارنی جنرل نے کمیٹی کو آگاہ کیا کہ لاپتا افراد کمیشن کے سربراہ کے لیے سابق سپریم کورٹ جج کی نامزدگی کی منظوری دے دی گئی ہے۔

اجلاس کے دوران ہائی کورٹس میں غیر ملکی ثالثی ایوارڈز، نیشنل ٹیرف کمیشن اور اینٹی ڈمپنگ کیسز کے لیے مخصوص بینچز کی تشکیل پر اطمینان کا اظہار کیا گیا۔ کمیٹی نے مختلف کیٹیگریز کے مقدمات، خصوصاً پرانے وراثتی کیسز کے نمٹانے میں عدلیہ کی کارکردگی کو سراہا۔

اعداد و شمار کے مطابق پنجاب کی ضلعی عدلیہ نے 92 فیصد جبکہ بلوچستان کی ضلعی عدلیہ نے ترجیحی کیسز میں 88 فیصد فیصلے کیے۔ سندھ، پشاور، بلوچستان اور اسلام آباد کی ہائی کورٹس نے 2019 تک کے تمام پرانے وراثتی مقدمات نمٹا دیے ہیں۔

کمیٹی نے جھوٹی اور بے جا مقدمہ بازی کی حوصلہ شکنی کے لیے قانون سازی اور پالیسی فریم ورک پر پیشرفت کا جائزہ لیا، جبکہ اٹارنی جنرل نے بار کونسلز کی ہڑتالوں کے مسئلے کے حل کے لیے طریقہ کار وضع کرنے کی یقین دہانی کرائی۔

اجلاس میں جیل اصلاحات سے متعلق پرژن ریفارم ایکشن پلان کا بھی جائزہ لیا گیا اور جون 2026 میں اس حوالے سے نیشنل کانفرنس منعقد کرنے کی ہدایت جاری کی گئی۔

مزید برآں عدالتی و قانونی زبان میں صنفی امتیاز کے خاتمے کے لیے جینڈر فیئر لینگویج فریم ورک 2026 کی منظوری دی گئی، جبکہ خواتین کے لیے ویمن فیسیلیٹیشن سینٹرز کے قیام کی توثیق بھی کی گئی۔

عدالتی نظام میں شفافیت کے فروغ کے لیے نیشنل جوڈیشل اینالیٹکس ڈیش بورڈ کے گورننس فریم ورک کی منظوری دی گئی، جبکہ ہائی کورٹس کو ای آفس نظام کے نفاذ پر غور کی ہدایت بھی جاری کی گئی۔

کمیٹی نے بچوں کی والدین سے ملاقات کے لیے ضلعی عدالتوں میں تعطیلات کے دوران سہولت فراہم کرنے اور عدالتی اصلاحات پر ججز سے رائے لینے کے لیے گمنام سروے کرانے کی ہدایت بھی جاری کی۔