لاہور: تقریروں سے کشمیر کا مسئلہ حل نہیں ہوگا، سراج الحق

لاہور (ڈیلی اردو) امیر جماعت اسلامی سراج الحق نے کہا ہے کہ تقریروں سے کشمیر کا مسئلہ حل نہیں ہوگا بلکہ اس کے لئے عملی قدم اٹھانا ہوگا۔

لاہورمیں کشمیر بچاؤ مارچ سے خطاب کرتے ہوئے سراج الحق نے کہا کہ عمران خان اقوام متحدہ گئے لیکن ڈاکٹر عافیہ پر ایک لفظ نہیں بولے، تقریروں سے کشمیر کا مسئلہ حل نہیں ہوگا بلکہ اس کے لئے عملی قدم اٹھانا ہوگا۔ انہوں نے کہا سینکڑوں کشمیری شہید ہوگئے ہیں اور 300 سے زائد بیٹیوں کو بھارتی فوج نے اٹھا لیا ہے۔

امیر جماعت اسلامی کا کہنا تھا کہ کراچی، پشاور سمیت ملک کے دیگر شہروں سے بھی لوگ کشمیر کیلئے نکل رہے ہیں۔ 27 ستمبر کے بعد آج 6 اکتوبر آگیا، کشمیر سے کرفیو نہیں ہٹایا گیا۔

انہوں نے کہا کہ خیال تھا کہ وزیر اعظم اقوام متحدہ میں جانے سے پہلے سیاسی جماعتوں کو اکٹھا کریں گے۔ انہوں نے کہا کہ مقبوضہ کشمیر کے لوگ پاکستان کی طرف دیکھ رہے ہیں، وزیر اعظم کی تقریر ان کا پیچھا کررہی ہے، تقریر وزیر اعظم کو تلاش کررہی ہے۔