لاہور: خواجہ برادران کے جوڈیشل ریمانڈ میں 16 روز کی توسیع

لاہور (ویب ڈیسک) لاہور کی احتساب عدالت نے پیراگون ہاؤسنگ اسکینڈل میں گرفتار خواجہ سعد رفیق اور سلمان رفیق کے جوڈیشل ریمانڈ میں 16 روز کی توسیع کردی۔

احتساب عدالت کے جج سید نجم الحسن نے خواجہ برادران کیخلاف کیس کی سماعت کی۔

دوران سماعت عدالت نے استفسار کیا کہ خواجہ سعد رفیق اور خواجہ سلمان رفیق کیخلاف ریفرنس کا کیا بنا جس پر تفتیشی افسر نے عدالت کو بتایا کہ 90 روز پورے ہونے تک پیراگون ہاؤسنگ کاریفرنس پیش کر دیا جائے گا۔

عدالت نےخواجہ برادران کےخلاف حتمی رپورٹ داخل کرنے کا حکم د یتے ہوئے تفتیشی افسر کو جلد کام کرکے ریفرنس دائر کرنے کی ہدایت کر دی۔

عدالت نے خواجہ برادران کے جوڈیشل ریمانڈ میں 4 مارچ تک کی توسیع کرتے ہوئے سماعت ملتوی کر دی۔

احتساب عدالت میں خواجہ برادران کی پیشی کے موقع پر عدالت کے اطراف سیکورٹی کے سخت انتظامات کئے گئے تھے جبکہ کنٹینر لگاکر راستے بند کردیے گئے تھے۔