لبنان: حزب اللہ کے حملے میں امن فورس کا فرانسیسی فوجی ہلاک، 3 زخمی

پیرس (ڈیلی اردو/اے ایف پی) فرانسیسی صدر ایمانوئل ماکروں نے آج ہفتہ  18 اپریل کو بتایا ہے کہ لبنان کے جنوبی حصے میں تعینات بین الاقوامی افواج کا  ایک فرانسیسی فوجی مارا گیا ہے۔ انہوں نے مزید کہا کہ شواہد سے پتا چلتا ہے کہ اس حملے کی ذمہ دار ایران کی حمایت یافتہ مسلح تنظیم حزب اللہ پر عائد ہوتی ہے۔

سوشل میڈیا پلیٹ فارم ایکس پر ایک پوسٹ میں ماکروں نے لکھا کہ مزید تین فوجی زخمی ہوئے ہیں، جنہیں وہاں سے نکال لیا گیا ہے۔ انہوں نے لبنانی حکومت پر زور دیا کہ وہ مبینہ ذمہ داروں کے خلاف کارروائی کرے۔

خبر رساں ادارے روئٹرز کے مطابق یہ فرانسیسی فوجی لبنان میں اقوام متحدہ کی عبوری فورس (UNIFIL) کا حصہ تھے۔

یہ واقعہ ایک ایسے وقت میں رونما ہوا ہے، جب لبنان اور اسرائیل سیز فائر  کی ایک ڈیل پر متفق ہو چکے ہیں۔ اطلاعات ہیں کہ اس ڈیل کی وجہ سے اسرائیل اور حزب اللہ کے مابین لڑائی تھم چکی ہے۔ اس دس روزہ جنگ بندی کے اعلان کے بعد جنوبی لبنان میں عوام نے اطمینان کا اظہار کیا ہے۔

اس جنگ بندی کے بعد امریکی صدر ڈونلڈ ٹرمپ نے کہا کہ انہوں نے اسرائیلی اور لبنانی رہنماؤں کو وائٹ ہاؤس آنے کی دعوت دی ہے تاکہ ان دونوں ہمسایہ ممالک کے مابین اعلیٰ سطحی سیاسی رابطے ممکن ہو سکیں۔

ادھر اسرائیلی فوج کے مطابق لبنان میں توپخانوں کے ذریعے 14 ہزار 900 حملے کیے گئے جبکہ فضائی بمباری میں 2500 اہداف کو نشانہ بنایا گیا۔

اسرائیلی فوج کا مزید کہنا تھا کہ لبنان میں حملے کے دوران 165 کثیر المنزلہ عمارتوں کو نشانہ بنایا گیا۔

لبنانی صحت کے حکام کا کہنا ہے کہ لبنان میں چھ ہفتوں سے جاری تنازعے میں 2100 افراد ہلاک ہو چکے ہیں اور 10 لاکھ سے زائد بے گھر ہوئے۔