لبنان سے انخلا نہیں ہوگا، اسرائیلی فوج سکیورٹی زونز میں موجود رہیگی، وزیر دفاع

یروشلم (ڈیلی اردو) اسرائیل کے وزیرِ دفاع اسرائیل کاٹز نے کہا ہے کہ اسرائیلی فوج جنوبی لبنان میں قائم "سکیورٹی زونز" میں اپنی موجودگی برقرار رکھے گی اور کسی بھی خطرے کی صورت میں فوری کارروائی کرنے کے احکامات رکھتی ہے۔

ان کا بیان ایسے وقت میں سامنے آیا ہے جب سوئٹزرلینڈ کے شہر برگن شٹاخ میں امریکہ اور ایران کے درمیان تکنیکی سطح کے مذاکرات جاری ہیں، جن میں لبنان میں جنگ کا خاتمہ اور جنگ بندی کو مؤثر بنانا اہم ایجنڈا قرار دیا جا رہا ہے۔

اسرائیلی وزیر دفاع نے واضح کیا کہ اسرائیل اپنی سلامتی پر کوئی سمجھوتہ نہیں کرے گا اور حزب اللہ کی جانب سے کسی بھی ممکنہ خطرے کا بھرپور جواب دیا جائے گا۔

دوسری جانب جمعے کو اسرائیل اور حزب اللہ کے درمیان جنگ بندی کا اعلان کیا گیا تھا، تاہم لبنان کی سرکاری خبر رساں ایجنسی کے مطابق ہفتے کے روز اسرائیلی حملوں میں 20 افراد ہلاک ہوئے، جس سے جنگ بندی پر سوالات اٹھ گئے۔

ایران نے جنوبی لبنان میں اسرائیلی کارروائیوں کو امریکہ کے ساتھ طے پانے والی مفاہمتی یادداشت کی خلاف ورزی قرار دیتے ہوئے خبردار کیا ہے کہ اگر لبنان میں حملے بند نہ ہوئے تو تہران مذاکراتی عمل سے دستبردار ہونے پر غور کر سکتا ہے۔

تاہم تازہ اطلاعات کے مطابق جنوبی لبنان میں اس وقت لڑائی میں نمایاں کمی آئی ہے اور دونوں فریقوں کے درمیان نسبتاً سکون برقرار ہے، جبکہ امریکہ، ایران اور ثالث ممالک جنگ بندی کو برقرار رکھنے اور کشیدگی کم کرنے کے لیے سفارتی کوششیں جاری رکھے ہوئے ہیں۔