لبنان میں اسرائیلی ڈرون حملہ، تین افراد ہلاک

بیروت (ڈیلی اردو) جنوبی لبنان میں پیر کے روز ایک گاڑی پر کیے گئے اسرائیلی ڈرون حملے کے نتیجے میں تین افراد ہلاک ہو گئے، جن میں تین سالہ بچہ بھی شامل ہے۔ لبنانی وزارتِ صحت کے مطابق یہ واقعہ ضلع صور کے قصبے یانوح میں پیش آیا۔

مقامی ذرائع کا کہنا ہے کہ ہلاک ہونے والا بچہ اور اس کا والد، جو لبنانی سکیورٹی فورسز کے رکن تھے، اتفاقاً حملے کے وقت وہاں سے گزر رہے تھے۔

اسرائیل اور ایران نواز مسلح گروپ حزب اللہ کے درمیان نومبر 2024 کے آخر سے جنگ بندی نافذ ہے، تاہم اسرائیل حزب اللہ پر معاہدے کی خلاف ورزی اور دوبارہ منظم ہونے کے الزامات کے تحت تقریباً روزانہ کی بنیاد پر لبنان میں حملے جاری رکھے ہوئے ہیں۔

سرکاری اعداد و شمار کے مطابق جنگ بندی کے بعد سے اسرائیلی حملوں میں لبنان میں 300 سے زائد افراد ہلاک ہو چکے ہیں، جن میں سے 100 سے زیادہ عام شہری شامل ہیں۔

ایک الگ پیش رفت میں، اسرائیلی فوج نے کہا ہے کہ اس نے جنوبی لبنان میں شدت پسند گروہ الجماعت الاسلامیہ کے ایک اعلیٰ رکن کو گرفتار کر کے اسرائیل منتقل کر دیا ہے، جہاں اس سے مزید تفتیش کی جائے گی۔ یہ سنی گروہ لبنان میں حزب اللہ اور فلسطینی تنظیم حماس سے منسلک ہے اور اپنے بیانات میں اسرائیل کے خلاف شیعہ ملیشیا کی جدوجہد کی حمایت کرتا ہے۔

اس شدت پسند گروہ نے اسرائیلی فوج کی کارروائی اور اپنے عہدیدار عطوی عطوی کے اغوا کی مذمت کی اور کہا کہ انہیں نامعلوم مقام پر لے جایا گیا ہے۔ لبنانی سکیورٹی ذرائع نے تصدیق کی کہ عطوی گروہ کے ایک اعلیٰ رکن ہیں، تاہم لبنان کی جانب سے ابھی تک اس گرفتاری پر کوئی سرکاری بیان سامنے نہیں آیا۔