لکی مروت میں پولیس اہلکار اغوا کے بعد ہلاک

لکی مروت (ڈیلی اردو) صوبہ خیبر پختونخوا کے ضلع لکی مروت میں پولیس کانسٹیبل کو اغوا کرنے کے بعد گولی مار کر ہلاک کردیا گیا۔

پولیس کے مطابق گزشتہ روز گاؤں لنڈ احمد خیل علاقہ تھانہ صدر میں پولیس کانسٹیبل فرمان اللہ اور اس کے دوسرے ساتھی امان اللہ کو مسلح افراد نے اغوا کرلیا تھا۔

امان اللہ کو مسلح افراد نے تشدد کا نشانہ بنانے کے بعد چھوڑ دیا جبکہ فرمان اللہ کو گولی مار کر ہلاک کردیا۔ پولیس کانسٹیبل فرمان اللہ پولیس لائن لکی مروت میں نائٹ ڈیوٹی پر تھا۔

ہلاک ہونے والے پولیس کانسٹیبل کے بارے میں بتایا گیا ہے کہ وہ چند مہینے پہلے اشتہاریوں کے ساتھ مقابلے میں بھی زخمی ہوا تھا۔

مسلح افراد مذکورہ پولیس کانسٹیبل کو موٹرسائیکل پر زبردستی اپنے ساتھ وانڈہ سیمو پہاڑ لے گئے تھے اور بعد میں گولی مار کر ہلاک کردیا گیا۔

ادھر کالعدم تحریک طالبان پاکستان نے پولیس کانسٹیبل کی ہلاکت کی ذمہ داری قبول کرلی۔