معروف ٹی وی کمپیئر طارق عزیز انتقال کر گئے

لاہور (ڈیلی اردو) پاکستان کے معروف ٹی وی میزبان اور طارق عزیز شو اور بزم طارق عزیز جیسے شہرہ آفاق ٹی وی پروگرام سے شہرت پانے والے طارق عزیز انتقال کرگئے۔

وزیراعظم عمران خان نے طارق عزیز کی وفات پر ان کے اہلخانہ سے تعزیت کرتے ہوئے اپنے پیغام میں کہا کہ وہ اپنے وقت کے آئیکون اور ٹی وی گیم شوز کی بنیاد رکھنے والے تھے۔

پی ٹی وی کے پہلے نیوز کاسٹر اور مشہور پروگرام نیلام گھر کے بانی 28 اپریل 1936 کو مشرقی پنجاب کے ضلع جالندھر میں پیدا ہوئے۔

طارق عزیزنے اپنے فنی کیرئر کا آغاز ریڈیو پاکستان سے کیا اور پی ٹی وی کے آغاز پر وہ نہ صرف اس کے اولین اینکر بنے بلکہ بزم طارق عزیز، نیلام گھر اور طارق عزیز شو کے نام سے ان کا پروگرام چار دہائیوں تک پی ٹی وی کا سب سے معروف پروگرام رہا۔

طارق عزیز کو ادبی خدمات کے اعتراف میں انیس سو بانوے میں پرائڈ آف پرفارمنس سے نوازا گیا،وہ انیس سو ستانوے میں مسلم لیگ (ن) کے ٹکٹ پر رکن قومی اسمبلی منتخب ہوئے،انیس سو ننانوے میں مسلم لیگ نون کی حکومت ختم ہوئی تو طارق عزیز نے مسلم لیگ (ق) میں شمولیت اختیار کی، تاہم انہوں نے سیاست سے کنارہ کشی اختیار کرکے دوبارہ ٹی وی کا رخ کیا۔

طارق عزیز نے فلم انڈسٹری میں بھی کام کیا، 1967 میں انہوں نے اپنے وقت کے سپراسٹار وحید مراد اور زیبا کے ہمراہ فلم انسانیت میں کام کیا جبکہ ان کی فلم سالگرہ سینما سکرین پر سپر ہٹ رہی، وہ ایک طرف اپنا ٹی وی پروگرام کرتے تھے، دوسری طرف مشاعروں کی رونق بڑھاتے تھے اور اس کے ساتھ فلاح انسانیت کے لئے بھی مختلف سرگرمیاں منعقد کرتے رہتے تھے۔

طارق عزیز کی کوئی اولاد نہ تھی، انہوں ‌نے وصیت میں اپنی ساری دولت فلاحی مقاصد کے لئے وقف کر دی تھی۔