مہسا امینی اور ہزاروں مظاہرین کی ہلاکتیں ایران کے سیاہ چہرے کو بے نقاب کرتی ہیں، امریکہ

تہران/واشنگٹن (ڈیلی اردو/اے پی/اے ایف پی/ڈی پی اے) ایران میں پولیس حراست کے دوران ہلاک ہونے والی 22 سالہ مہسا امینی کی تیسری برسی کے موقع پر متاثرین اور مظاہرین کے لواحقین نے عالمی رہنماؤں کے نام ایک کھلا خط جاری کیا ہے جس میں تہران کے خلاف فوری بین الاقوامی اقدامات کا مطالبہ کیا گیا ہے۔

خط کے دستخط کنندگان نے خبردار کیا ہے کہ موجودہ عالمی پالیسیوں نے ایرانی حکومت کو مزید طاقتور اور جری بنا دیا ہے۔ خط میں کہا گیا کہ ’’ایرانی عوام نے آزادی کے لیے خون بہایا ہے۔ اب وقت آگیا ہے کہ عالمی برادری اپنی سلامتی کے لیے عملی قدم اٹھائے۔‘‘

یاد رہے کہ ستمبر 2022 میں ایران کی نام نہاد اخلاقی پولیس نے مہسا امینی کو حجاب قوانین کی مبینہ خلاف ورزی پر گرفتار کیا تھا، تاہم وہ حراست کے دوران ہلاک ہوگئیں۔ ان کی موت کے بعد ملک گیر سطح پر بڑے پیمانے پر احتجاجی تحریک اٹھی جسے ’’خواتین، زندگی، آزادی‘‘ کے نعرے سے جانا گیا۔

انسانی حقوق کی تنظیموں کے مطابق ایرانی حکام کی کریک ڈاؤن کارروائیوں کے دوران کم از کم 551 مظاہرین، بشمول 68 بچے، ہلاک اور ہزاروں گرفتار ہوئے۔

معروف ایرانی فلم ساز جعفر پناہی نے انسٹاگرام پر اپنی پوسٹ میں لکھا کہ مہسا امینی کی موت نے سب کچھ بدل دیا۔ ’’گلی وہی نہیں رہی، شہر وہی نہیں رہا، ہم وہی لوگ نہیں رہے۔ عوام کے خون اور سینکڑوں لاشوں نے سب کچھ غیر معمولی کر دیا ہے۔‘‘

دوسری جانب امریکہ نے بھی مہسا امینی کی برسی پر اسلامی جمہوریہ ایران کی قیادت کی سخت مذمت کی ہے۔ امریکی محکمہ خارجہ کے ترجمان تھامس ٹومی پیگوٹ نے بیان میں کہا کہ ’’ہم مہسا امینی کی یاد کو خراج عقیدت پیش کرتے ہیں جن کی نوجوان زندگی اسلامی جمہوریہ نے چھین لی۔‘‘

انہوں نے کہا کہ ’’ان کا قتل اور ہزاروں دیگر مظاہرین کی ہلاکتیں اسلامی جمہوریہ کے انسانیت کے خلاف جرائم کا ثبوت ہیں۔ امریکہ اپنے اتحادیوں کے ساتھ مل کر ایران کے مظالم پر احتساب اور انصاف کے لیے دباؤ ڈالتا رہے گا۔‘‘

پیگوٹ نے مزید کہا کہ امریکہ ایرانی عوام کے ساتھ کھڑا ہے جو عزت اور بہتر زندگی کا مطالبہ کر رہے ہیں، اور تہران پر زیادہ سے زیادہ دباؤ جاری رکھے گا تاکہ اسے اپنے عوام اور پڑوسیوں کے خلاف اقدامات پر جواب دہ بنایا جا سکے۔