نیب نے ن لیگ کے مرکزی رہنما احسن اقبال کو گرفتار کرلیا

اسلام آباد (ڈیلی اردو) قومی احتساب بیورو (نیب) نے سابق وزیر داخلہ و مسلم لیگ (ن) کے مرکزی رہنما احسن اقبال کو گرفتار کر لیا۔

تفصیلات کے مطابق نیب راولپنڈی نے احسن اقبال کو نارووال اسپورٹس سٹی کرپشن کیس میں گرفتار کیا ہے اور انہیں کل احتساب عدالت میں پیش کیا جائے گا۔

نیب کی جانب سے جاری اعلامیہ میں کہا گیا ہے کہ سابق وزیر داخلہ احسن اقبال کو گرفتار کر لیا گیا۔ ان کی گرفتاری نارووال اسپورٹس کمپلیکس کی تحقیقات کے لیے عمل میں لائی گئی۔

نیب راولپنڈی نے احسن اقبال کو آج اپنے دفتر طلب کر رکھا تھا۔ نیب ذرائع کے مطابق انہیں کل ریمانڈ کے لیے احتساب عدالت میں پیش کیا جا سکتا ہے۔

ن لیگ کی ترجمان مریم اورنگزیب نے گرفتاری کی مذمت کرتے ہوئے میڈیا سے گفتگو میں دعویٰ کیا کہ منصوبے کی منظوری احسن اقبال نے نہیں بلکہ پاکستان پیپلز پارٹی کے دور میں ہوئی۔

انہوں نے کہا گرفتاری سے ’نیازی ۔ نیب‘ گٹھ جوڑ سامنے آ گیا۔ ’گرفتاریوں کا سلسلہ اس لیے جاری ہے کہ وزیر اعظم عمران خان کی حکومت ختم ہونے والی ہے۔‘

انہوں نے کہا کہ ہم کرپشن کے ثبوت مانگتے ہیں تو کوئی جواب نہیں ملتا۔ ’آج مفتاح اسماعیل کی ضمانت ہوئی تو نیب نے کہا کہ ان کے پاس کرپشن کا کوئی ثبوت نہیں۔