وزیراعظم عمران خان کی نوازشریف سے مریم نواز کی ملاقات کرانے کی ہدایت

اسلام آباد (ویب ڈیسک) وزیراعظم عمران خان نے وزیراعلیٰ پنجاب عثمان بزدار کو سروسز ہسپتال لاہور میں زیر علاج نوازشریف سے ان کی صاحبزادی مریم نواز کی ملاقات کرانے کی ہدایت کردی۔

ذرائع کے مطابق وزیراعظم عمران خان نے وزیراعلیٰ پنجاب عثمان بزدار سے ٹیلیفونک رابطہ کر کے انہیں مریم نواز کی نوازشریف سے ملاقات کے انتظامات کرنے کی ہدایت کی۔ وزیراعظم عمران خان نے کہا کہ مریم نواز کی اسپتال میں زیر علاج نوازشریف سے ملاقات کے لیےانتظامات کیے جائیں۔

خیال رہے کہ لاہور کی احتساب عدالت میں پیشی کے دوران مریم نواز نے والد سے ملاقات کی درخواست کی تھی  اور اس دوران وہ آبدیدہ بھی ہوگئیں تھیں۔ عدالت نے ان کی درخواست کو  دائرہ اختیار میں نہ ہونے کے باعث رد کردیا تھا۔ اس سے قبل بھی وزیراعظم عمران خان نے وزیراعلیٰ عثمان بزدار کو ٹیلیفون کرکے نواز شریف کو ہر ممکن طبی سہولت فراہم کرنے کی ہدایت کی تھی۔

یاد رہے کہ نواز شریف ان دنوں سروسز اسپتال میں زیر علاج ہیں جبکہ اُن کی صاحبزادی مریم نواز چوہدری شوگر ملز کیس میں جوڈیشل ریمانڈ پر کوٹ لکھپت جیل میں قید ہیں۔