وزیراعظم عمران خان کے خلاف توہین رسالتؐ کا مقدمہ درج کرنے کی درخواست

اسلام آباد (ڈیلی اردو) وزیراعظم پاکستان کے خلاف توہین رسالت کا مقدمہ درج کروانے کیلئے درخواست تھانہ مارگلہ اسلام آباد میں جمع کروا دی۔

شہری چوہدری ناصر عباس منہاس ایڈووکیٹ نے درخواست میں موقف اختیار کیا کہ وزیراعظم عمران خان نیازی کے توہین آمیز کلمات سے کروڑوں مسلمانوں کی دل آزاری اور مذہبی جذبات مجروح ہوئے۔

درخواست میں مزید کہا گیا کہ میں 17 برس سے وکالت کرتا ہوں، سوشل میڈیا پر ایک کلپ موصول ہوا،جو 9 دسمبر کو جیو نیوز پر چلا ،جس میں ملزم عمران احمد خان نیازی سکنہ بنی گالہ کو اسلام آباد میں ایک تقریب سے خطاب کرتے ہوئے دکھایا گیا،عمران خان نے اپنی تقریر میں نبی کریم صلی اللہ علیہ وسلم کی شان میں نازیبا الفاظ استعمال کئے،جس سے مجھ سمیت تمام مسلمانوں کے جذبات مجروح ہوئے۔

درخواست گزار نے کہا کہ وزیراعظم عمران خان کی جانب سے توہین رسالت ﷺ کا ارتکاب کئے جانے پر ان کے خلاف 295 سی اور 295 اے کے تحت فوری طور پر مقدمہ درج کرکے قانون کے مطابق کاروائی کرتے ہوئے ان کی گرفتاری عمل میں لائی جائے۔