ٹانک : کوٹ گلان میں سکول کی عمارت پھر نشانہ، بچوں کا آخری کمرہ بھی تباہ

ٹانک(ڈیلی اردو) خیبرپختونخواہ کے شورش زدہ  ضلع ٹانک کے علاقے کوٹ گلان میں سرکاری پرائمری سکول ایک بار پھر دھماکے کی زد میں آگیا، رات کے وقت کیے گئے مبینہ حملے میں عمارت کا وہ واحد کمرہ بھی تباہ ہوگیا جو پہلے حملے کے بعد تدریسی سرگرمیوں کے لیے استعمال ہو رہا تھا۔

مقامی ذرائع کے مطابق نامعلوم مسلح افراد نے گورنمنٹ پرائمری بوائز سکول کو بارودی مواد سے نشانہ بنایا۔ دھماکے کے وقت سکول بند ہونے کے باعث کسی جانی نقصان کی اطلاع نہیں ملی۔

ذرائع کا کہنا ہے کہ چند ماہ کے دوران تعلیمی ادارے کو دوسری مرتبہ نقصان پہنچایا گیا ہے۔ 14 اپریل کو ہونے والے پہلے دھماکے میں سکول کے ایک کلاس روم اور چار دیواری کو نقصان پہنچا تھا، جبکہ عمارت کے دیگر حصے بھی متاثر ہوئے تھے۔

پہلے واقعے کے بعد سکول میں صرف ایک کمرہ ایسا رہ گیا تھا جہاں اساتذہ بچوں کو پڑھا رہے تھے، تاہم حالیہ دھماکے نے وہ سہولت بھی ختم کردی۔ سکول کی عمارت مکمل طور پر ناقابلِ استعمال ہونے سے علاقے کے بچوں کی تعلیم کا سلسلہ متاثر ہونے کا خدشہ ہے۔

مقامی افراد نے واقعے پر تشویش کا اظہار کرتے ہوئے حکومت سے مطالبہ کیا ہے کہ سکول کو دوبارہ تعمیر کرنے کے ساتھ ساتھ علاقے کے تعلیمی اداروں کے تحفظ کے لیے بھی مؤثر اقدامات کیے جائیں۔