ٹانک: سکیورٹی فورسز کا زام کے علاقے میں آپریشن، 5 دہشتگرد اور ایک اہلکار ہلاک، 3 زخمی

ٹانک(ڈیلی اردو) خیبرپختونخواہ کے شورش زدہ ضلع ٹانک کے علاقے زام میں سکیورٹی فورسز نے خفیہ اطلاع پر کارروائی کرتے ہوئے 5 دہشتگردوں کو ہلاک اور 3 کو زخمی کردیا، جبکہ فائرنگ کے شدید تبادلے میں پاک فوج کا سپاہی اعجاز احمد بھی ہلاک ہوگیا۔

دستیاب اطلاعات کے مطابق سکیورٹی فورسز نے علاقے میں دہشتگردوں کی موجودگی کی اطلاع پر کارروائی کی، جس کے دوران فائرنگ کا شدید تبادلہ ہوا۔ کارروائی کے بعد ہلاک دہشتگردوں کے قبضے سے اسلحہ اور گولہ بارود بھی برآمد کیا گیا۔

اطلاعات کے مطابق کارروائی کے بعد سکیورٹی فورسز نے علاقے میں سرچ اور کلیئرنس آپریشن جاری رکھا تاکہ وہاں موجود دیگر ممکنہ دہشتگردوں کا سراغ لگا کر علاقے کو محفوظ بنایا جاسکے۔