ٹانک میں سیکورٹی چوکیوں پر شدت پسندوں کے ڈرون حملے، 4 اہلکار زخمی

ٹانک (ڈیلی اردو رپورٹ) پاکستان کے شورش زدہ صوبے خیبر پختونخوا کے جنوبی ضلع ٹانک میں شدت پسندوں کی جانب سے سیکیورٹی فورسز کی مختلف چوکیوں پر ڈرون حملے کیے گئے، جن کے نتیجے میں کم از کم چار اہلکار زخمی ہوگئے۔

مقامی ذرائع کے مطابق پہلا حملہ ٹانک کے علاقے گومل کے گاؤں کوٹ اعظم میں واقع سیکیورٹی پوسٹ پر کیا گیا، جہاں شدت پسندوں نے کواڈ کاپٹر کے ذریعے دھماکہ خیز مواد گرایا۔ 

پولیس اور سیکیورٹی حکام کا کہنا ہے کہ حملے میں تین اہلکار زخمی ہوئے، جنہیں فوری طور پر قریبی اسپتال منتقل کر دیا گیا۔

دوسرا ڈرون حملہ سیر کمر پوسٹ پر کیا گیا، جس کے نتیجے میں ایک اہلکار زخمی ہوا۔ حملوں کے بعد سیکیورٹی فورسز نے فوری جوابی کارروائی شروع کی اور فورسز و شدت پسندوں کے درمیان شدید فائرنگ کا تبادلہ ہوا۔ 

ذرائع کے مطابق مؤثر جوابی کارروائی کے بعد شدت پسند فرار ہوگئے۔

واقعے کے بعد علاقے کو گھیرے میں لے کر سرچ آپریشن شروع کر دیا گیا ہے جبکہ اطراف میں سیکیورٹی مزید سخت کر دی گئی ہے۔

ادھر ٹانک سٹی میں فیڈرل کانسٹیبلری (DOFC) کے ڈسٹرکٹ آفیسر کی رہائش گاہ کے قریب بھی ایک نگرانی ڈرون کو منڈلاتے ہوئے دیکھا گیا، جس کے بعد سیکیورٹی اداروں کو ہائی الرٹ کر دیا گیا ہے۔

واقعے کے حوالے سے سرکاری سطح پر باضابطہ بیان جاری نہیں کیا گیا۔