پاراچنار: شیعہ سنی قبائل میں تیسرا امن معاہدہ

پاراچنار(ڈیلی اردو) صوبہ خیبر پختونخوا کے قبائلی ضلع کرم کی تحصیل اپر کرم اور سینٹرل کرم کے درمیان جاری کشیدگی کے خاتمے کے لیے قبائلی رہنماؤں اور ضلعی انتظامیہ کی کوششیں رنگ لے آئیں، دونوں فریقین نے ایک اور امن معاہدے پر اتفاق کر لیا۔ یہ معاہدہ خومسہ میں منعقد ہونے والے ایک اہم قبائلی جرگے کے دوران طے پایا، جس میں کثیر تعداد میں عمائدین اور انتظامی نمائندوں نے شرکت کی۔

انتظامیہ کے مطابق کڑمان، دونگیلہ، خمد، اور چمکنی سمیت مختلف علاقوں سے آنے والے قبائلی مشران نے اس معاہدے کی توثیق کی۔ کمشنر کرم اشفاق خان نے تصدیق کی کہ یہ تیسرا بڑا معاہدہ ہے، اور ضلعی حکام مزید ایسے اقدامات کے لیے پرعزم ہیں تاکہ دیرپا امن یقینی بنایا جا سکے۔

مقامی عمائدین کا کہنا ہے کہ علاقائی امن صرف وقتی ضرورت نہیں بلکہ پائیدار خوشحالی کے لیے ناگزیر ہے۔ ان کا کہنا تھا کہ ان شیعہ سنی جھڑپوں میں اب تک سینکڑوں قیمتی جانیں ضائع ہو چکی ہیں، اور اب وقت آ گیا ہے کہ باہمی رنجشوں کو پسِ پشت ڈال کر ایک نئے دور کا آغاز کیا جائے۔

انتظامیہ نے واضح کیا ہے کہ معاہدے کی شرائط پر مکمل عملدرآمد یقینی بنایا جائے گا، تاکہ ماضی کی غلطیاں نہ دہرائی جائیں اور علاقے کو مستقل امن و استحکام کی راہ پر گامزن رکھا جا سکے۔