پاراچنار کے نواحی علاقے میں دھماکا، ایک نوجوان زخمی، دو بم ناکارہ بنا دیئے گئے

پاراچنار (نمائندہ ڈیلی اردو) صوبہ خیبر پختونخوا کے قبائلی ضلع کرم کے صدر مقام پاراچنار پاک افغان سرحد کے قریب علاقے شنگک میں بارودی سرنگ پھٹنے سے ایک نوجوان شدید زخمی ہوگیا۔

https://twitter.com/ShabbirTuri/status/1572136736645324801?t=Cv9yKjcPNr9V7C0EqWnFwg&s=19

نمائندہ ڈیلی اردو کے مطابق سرحدی علاقے شنگک بسو کلی میں آج علی الصبح کھیتوں میں رکھے گئے بارودی سرنگ کا دھماکہ ہوا جس میں ہادی حسین نامی ایک نوجوان شدید زخمی ہوگیا جسے فوری طور ہیڈ کوارٹر ہسپتال پاراچنار پہنچا دیا گیا جہاں پر ڈاکٹروں کے مطابق ان کی حالت خطرے سے باہر ہے۔

چند روز قبل بھی اسے علاقے میں بارودی سرنگ پھٹنے سے ایک بچہ زخمی ہوا تھا۔

واقعے کی اطلاع ملتے ہی پولیس ٹیم جائے وقوعہ پر پہنچی اور سرچ آپریشن کے دوران دو مزید بم برآمد ہوگئے جنہیں بعد میں ناکارہ بنا دیے گئے۔

پولیس کی جانب سے مزید تحقیقات جاری ہیں علاقہ مشران نے ملوث شرپسندوں کے خلاف کارروائی کرنے کا مطالبہ کیا ہے۔

گزشتہ کچھ عرصے سے خیبر پختونخوا کی وادی سوات اور قبائلی اضلاع سمیت مختلف علاقوں میں تحریک طالبان پاکستان (ٹی ٹی پی) سے منسلک عسکریت پسندوں کے منظر عام پر آنے اور کالعدم تنظیم کی سرگرمیاں شروع ہونے کے خلاف امن ریلیوں اور مظاہروں کا سلسلہ جاری ہے۔

اس سلسلے میں سوات کے مرکزی شہر مینگورہ اور افغانستان سے ملحقہ قبائلی ضلع کرم کے شہر سدہ میں اتوار کو ہزاروں افراد نے ہاتھوں میں سفید پرچم لیے امن کے حق میں اور دہشت گردوں کے خلاف احتجاج بھی کیا تھا۔