پاکستان: اسلام آباد میں افغان امن کانفرنس ملتوی

اسلام آباد (ڈیلی اردو) افغان صدر کی درخواست پر پاکستان میں افغان امن کانفرنس ملتوی کردی گئی۔

تین روزہ کانفرنس کا آغاز کل سے ہونا تھا تاہم افغان صدر اشرف غنی کی درخواست پر ملتوی کی گئی۔ پاکستان نے 17، 18 اور 19 جولائی کو افغان امن کانفرنس کا انعقاد کرنا تھا جس میں شرکت کے لئے افغان طالبان کو دعوت نہیں دی گئی تھی۔ کانفرنس کا مقصد افغانستان میں امن عمل کو آگے بڑھانا ہے۔ ترجمان دفترخارجہ نے کہا ہے کہ کانفرنس کی نئی تاریخوں کا اعلان بعد میں کیا جائے گا۔

کانفرنس میں افغانستان کی اعلیٰ قومی مصالحتی کونسل کے چیئرمین عبداللہ عبداللہ اور افغان وزیر خارجہ حنیف اتمر کو بھی مدعو کیا گیا تھا جبکہ گلبدین حکمتیار سمیت اہم افغان شخصیات نے شریک ہونا تھا۔

ياد رہے کہ پاکستان کی جانب سے جن مندوبین کو دعوت دی گئی تھی انہیں اسپیشل پرواز کے ذریعے کل اسلام آباد لایا جانا تھا۔

کانفرنس میں شرکت کے لئے 30 افغان رہنماؤں کو دعوت دی گئی ہیں ان میں سابق صدر حامد کرزئی، سیاف، عمرداود زئی، قانونی، نذیر احمد زئی، اسماعیل خان، واحدی، ولی محسود، خلیلی، محقق، منصور نادری، جنرل مراد، شفیع نورستانی، حامد گیلانی، جرات، فوزیہ کوفی، احمد ضیا مسعود، ذخیلوال، یاسینی اور عادل فہیم شامل ہیں۔