پاکستان: جولائی میں دہشت گردی میں اضافہ، 112 سکیورٹی اہلکار ہلاک ہوئے: پکس رپورٹ

اسلام آباد (ڈیلی اردو) پاکستان انسٹی ٹیوٹ فار کانفلکٹ اینڈ سکیورٹی اسٹڈیز (پکس) نے جولائی 2026 کی ماہانہ سکیورٹی رپورٹ جاری کر دی ہے، جس کے مطابق ملک میں دہشت گردی کے واقعات میں اضافہ ریکارڈ کیا گیا، جبکہ دہشت گردوں کے خلاف سکیورٹی فورسز کی کارروائیوں میں بھی نمایاں تیزی دیکھی گئی۔

رپورٹ کے مطابق جولائی کے دوران 112 سکیورٹی اہلکار ہلاک ہوئے، جو جنوری 2023 کے بعد کسی ایک ماہ میں سکیورٹی اہلکاروں کی سب سے زیادہ ہلاکتیں ہیں۔ جنوری 2023 میں 114 سکیورٹی اہلکار ہلاک ہوئے تھے۔

پکس کے مطابق جولائی میں سکیورٹی فورسز کی کارروائیوں کے دوران 401 دہشت گرد ہلاک ہوئے، جو گزشتہ ایک دہائی کے دوران کسی ایک ماہ میں ہلاک ہونے والے دہشت گردوں کی سب سے بڑی تعداد ہے۔ 

رپورٹ میں بتایا گیا ہے کہ جون کے مقابلے میں جولائی کے دوران دہشت گردوں کی ہلاکتوں میں 109 فیصد اضافہ ریکارڈ کیا گیا۔

رپورٹ کے مطابق جولائی میں دہشت گرد حملوں کے نتیجے میں 74 شہری اور امن کمیٹیوں کے 19 ارکان بھی ہلاک ہوئے، جبکہ شہری ہلاکتوں میں جون کے مقابلے میں 21 فیصد اضافہ ہوا۔ اسی عرصے کے دوران ایک دہائی میں سب سے زیادہ 8 خودکش حملے ریکارڈ کیے گئے۔

صوبائی صورتحال کے حوالے سے رپورٹ میں بتایا گیا کہ جولائی کے دوران بلوچستان میں 62 سکیورٹی اہلکار اور 54 شہری ہلاک ہوئے، جبکہ خیبر پختونخوا کے ضم اضلاع کے علاوہ دیگر علاقوں میں 38 سکیورٹی اہلکار ہلاک ہوئے۔ 

رپورٹ کے مطابق خیبر پختونخوا کے ضم شدہ اضلاع میں 79 سکیورٹی اہلکار ہلاک ہوئے۔

پکس کی رپورٹ کے مطابق 2026 کے پہلے سات ماہ کے دوران سکیورٹی فورسز کی کارروائیوں میں 1,857 دہشت گرد ہلاک ہوئے، جبکہ اسی عرصے میں 434 سکیورٹی اہلکار، 463 شہری اور امن کمیٹیوں کے 32 ارکان ہلاک ہوئے۔

رپورٹ میں کہا گیا ہے کہ دہشت گردی کے بڑھتے ہوئے خطرات کے باوجود سکیورٹی فورسز کی کارروائیاں جاری ہیں، جن کے نتیجے میں بڑی تعداد میں دہشت گرد ہلاک کیے گئے۔