پاکستان دہشتگردی سے نمٹنے کی مکمل صلاحیت رکھتا ہے، ترجمان دفتر خارجہ

اسلام آباد (ڈیلی اردو) ترجمان دفتر خارجہ ممتاز زہرا بلوچ نے کہا ہے کہ پاکستان دہشتگردی سے نمٹنے کی مکمل صلاحیت رکھتا ہے۔

اسلام آباد میں ممتاز زہرا بلوچ نے ہفتہ وار پریس کانفرنس کے دوران کہا کہ پاکستان نے 11 جنوری کو کابل میں دہشتگردی کے واقعے کی مذمت کی، وزیر خارجہ بلاول بھٹو نے قائم مقام افغان وزیر خارجہ سے کل فون پر بھی بات کی۔

ممتاز زہرا بلوچ نے بتایا کہ وزیراعظم شہباز شریف 2 روزہ دورہ پر کل ابوظہبی پہنچے جہاں تجارت، سرمایہ کاری اور شراکت داری کے امور پر بات ہوئی۔

انہوں نے کہا کہ وزیراعظم شہباز شریف آج شام وطن واپس پہنچیں گے۔

ترجمان دفتر خارجہ نے کہا کہ اقوام متحدہ کے سیکریٹری جنرل کے شکرگزار ہیں جنہوں نے مشترکہ طور پر جنیوا میں سیلاب زدگان کے لیے کانفرنس کی میزبانی کی۔

ممتاز زہرا بلوچ نے کہا کہ سیکریٹری جنرل یو این سیلاب زدگان کی آواز بنے اور کانفرنس میں شریک ہوئے۔

انہوں نے کہا کہ رواں موسم سرما میں لوگوں کو سردی سے بچانا ہماری فوری ترجیحات میں شامل ہے۔

ترجمان دفتر خارجہ نے کہا کہ بلاول بھٹو 16 تا 20 جنوری ڈیوس میں ورلڈ اکنامک فورم میں شرکت کریں گے۔

انہوں نے بتایا کہ بلاول بھٹو اور وزیر مملکت حنا ربانی کھر ڈیوس میں عالمی رہنماؤں سے ملیں گے۔