پاکستان: سی ٹی ڈی پنجاب نے کمانڈ اینڈ کنٹرول موبائل یونٹ فعال کر دیا

لاہور (ڈیلی اردو) پنجاب کے کاؤنٹر ٹیررازم ڈپارٹمنٹ (سی ٹی ڈی) نے اپنے جدید کمانڈ اینڈ کنٹرول موبائل یونٹ کو فعال کر دیا ہے، جو دہشت گردی کے خلاف آپریشنز میں نئی تکنیکی برتری فراہم کرے گا۔

سی ٹی ڈی پنجاب کے ترجمان کے مطابق یہ یونٹ ایک چلتا پھرتا ہیڈکوارٹر ہوگا جو حساس پروگراموں اور عوامی اجتماعات کی سیکیورٹی کے لیے استعمال ہوگا۔ اس موبائل یونٹ کو خاص طور پر رائیونڈ اجتماع، داتا دربار اور کرکٹ میچز جیسے اہم مواقع پر تعینات کیا جائے گا۔

ترجمان نے بتایا کہ یوم عاشورہ اور بڑے سیاسی اجتماعات میں بھی یہ یونٹ اہم کردار ادا کرے گا، کیونکہ اس کے ذریعے حساس پروگراموں کی مانیٹرنگ، کمانڈ اور کوآرڈینیشن ایک ہی جگہ سے ممکن ہوگی۔ لائیو آپریشنز کے دوران فورس کو ڈیٹا، ویڈیو فیڈ اور تجزیاتی معاونت فراہم کی جائے گی، تاکہ کسی بھی خطرے کا فوری اور مؤثر جواب دیا جا سکے۔

سی ٹی ڈی کے مطابق یہ موبائل یونٹ لاہور، کراچی، کوئٹہ، پشاور اور سرحدی علاقوں میں بیک اپ کمانڈ سینٹر کے طور پر بھی کام کرے گا۔ اس کے ذریعے جلسے، جلوس اور دیگر اجتماعات میں مشترکہ نگرانی، مشتبہ افراد کی فوری نشاندہی اور حساس روٹس یا رہائش گاہوں کی ٹریکنگ بھی ممکن ہو سکے گی۔

ترجمان کا کہنا تھا کہ کمانڈ اینڈ کنٹرول موبائل یونٹ کی تعیناتی سے سی ٹی ڈی فورسز کی کارکردگی میں اضافہ اور آپریشنل رسپانس وقت میں کمی متوقع ہے، جو عوامی سیکیورٹی کے لیے ایک اہم پیشرفت ہے۔