پشاور میں تھانہ بڈھ بیر شیخان پولیس چوکی پر دستی بم حملہ

پشاور (ڈیلی اردو) پشاور کے تھانہ بڈھ بیر شیخان پولیس چوکی پر دستی بم سے حملہ ہوا ہے۔

پولیس کے مطابق دھماکے سے عمارت کی دیوار کو جزوی نقصان پہنچا، موٹرسائیکل سوار ملزمان بم پھینک کر فرار ہوگئے جن کی تلاش کےلیے سرچ آپریشن جاری ہے۔

یاد رہے کہ دو روز قبل پشاور میں نامعلوم موٹر سائیکل سوار حملہ آور نے فائرنگ کرکے سکھ دکاندار کو قتل کر دیا۔

پولیس کے مطابق واقعہ گزشتہ روز پشاور کے علاقے دیر کالونی میں پیش آیا۔ ملزمان واردات کے بعد فرار ہونے میں کامیاب ہوگئے۔

اس سے قبل خیبرپختونخوا کے ضلع لکی مروت میں تھانہ صدر پر دہشت گردوں کے حملے میں 6 پولیس اہلکار زخمی جبکہ نزدیک سڑک پر نصب دھماکا خیز ڈیوائس پھٹنے کے نتیجے میں ڈپٹی سپرنٹنڈنٹ پولیس اقبال مہمند سمیت 4 اہلکار ہلاک ہوگئے۔

مسلح افراد نے رات گئے تھانہ صدر پر حملہ کیا تھا جس کی اطلاع ملنے پر مدد کے لیے جانے والی پولیس ٹیم کو راستے میں نشانہ بنانے کے لیے دیسی ساختہ بم استعمال کیا گیا۔