پشاور میں فوجی کانوائے پر شدت پسندوں کا حملہ، 4 اہلکار اور 6 شدت پسند ہلاک، 4 اہلکار شدید زخمی

پشاور (ڈیلی اردو) صوبہ خیبر پختونخواہ کے صوبائی دارالحکومت پشاور کے نواحی علاقے متنی شریکرہ کے مقام پر سکیورٹی فورسز کے کانوائے پر شرپسندوں نے حملہ کردیا، جوابی کارروائی میں 6 شدت پسند مارے گئے حملے میں 4 سیکیورٹی فورسز اہلکار ہلاک جبکہ 5 شدید زخمی ہوگئے جنہیں فوری طور پر سی ایم ایچ پشاور منتقل کر دیا گیا۔

آپریشن کے باعث کوہاٹ روڈ دونوں اطراف سے کئی گھنٹوں کے لئے بند کر دیا گیا تھا تاہم رات کو آپریشن کے اختتام کے بعد روڈ کلیئر کر دیا گیا۔

ابتدائی اطلاعات کے مطابق متنی شریکرہ کے کھوئی حسن خیل کے مقام شیخ نالہ نواب گھٹ کے مقام پر اس وقت آرمی اور ایف سی کے کانوائے پر حملہ کیا گیا جب قافلہ کوہاٹ سے واپس پشاور آرہا تھا کہ کالعدم تحریک طالبان پاکستان (ٹی ٹی پی) کے کمانڈر عبدالرحیم گروپ نے بھاری ہتھیاروں سے حملہ کیا جس کے باعث آرمی اور ایف سی کے نو سے دس اہلکار شدید زخمی ہوگئے۔

پشاور کے علاقے متنی میں سیکیورٹی فورسز کے قافلہ پر شرپسندوں کا حملہ، پشاور پولیس کی بھاری نفری اور بکتر بند گاڑیاں طلب، پاکستانی فوج کے تین اہلکار زخمی، ایک راہگیر ہلاک، ہلاکتوں کا خدشہ ہے۔#Mattani #Peshawar #Pakistan

— Shabbir Hussain Turi (@ShabbirTuri) October 3, 2022

اس موقع پر آرمی، پولیس، سی ٹی ڈی اور ایف سی کے تازہ دستے پہنچ گئے جس کے بعد دونوں اطراف سے بھاری ہتھیاروں سے فائرنگ ہوئی، تین سے زائد گھنٹے تک آپریشن جاری رہا جس کے نتیجے میں عبد الرحیم گروپ کے 6 شدت پسند مارے گئے جبکہ جبکہ ایک شدت پسند کو زخمی حالت میں گرفتار کرلیا گیا۔

 ذرائع کا کہنا تھا کہ ایف سی کے دو جبکہ پاکستان آرمی کے 2 سپاہی پناہ اور شمس ہلاک ہوگئے اور پانچ اہلکار شدید زخمی ہوگئے جنہیں سی ایم ایچ منتقل کر دیا گیا جہاں بعض زخمیوں کی حالت تشویشناک بتائی جاتی ہے۔

مقامی ذرائع کا کہنا ہے فائرنگ کی زد میں آکر ایک عام شہری بھی مارا گیا۔ جبکہ کئی شہری زخمی ہوگئے۔

ذرائع کے مطابق زخمیوں میں سپاہی آصف خان، شکور، نادر، عادل اور وسیم وغیرہ شامل ہیں۔

دوسری جانب کالعدم تنظیم تحریک طالبان پاکستان نے فوجی قافلے پر حملے کی ذمہ داری قبول کرلی ہے۔

‏نوٹ: یہ ابتدائی خبر ہے جس میں تفصیلات شامل کی جا رہی ہیں۔ بعض اوقات میڈیا کو ملنے والی ابتدائی معلومات درست نہیں ہوتی ہیں۔ لہٰذا ہماری کوشش ہے کہ ہم متعلقہ اداروں، حکام اور اپنے رپورٹرز سے بات کرکے باوثوق معلومات آپ تک پہنچائیں۔