پشاور: یکہ توت میں 11 کلو وزنی پریشر ککر بم ناکارہ، ممکنہ خطرہ ٹل گیا

پشاور(ڈیلی اردو) خیبرپختونخواہ کے شورش زدہ دارلحکومت پشاور کے علاقے یکہ توت کے حافظ آباد میں پولیس اور بم ڈسپوزل اسکواڈ نے کارروائی کرتے ہوئے 11 کلوگرام وزنی پریشر ککر بم ناکارہ بنا دیا۔ مشکوک بم ایک بند مکان سے ملا، جس کے بعد پولیس کو اطلاع دی گئی اور ماہر ٹیم نے موقع پر پہنچ کر اسے ناکارہ بنایا۔

پولیس کے مطابق مذکورہ مکان پانچ سے چھ ماہ قبل ایک افغان خاندان کو کرائے پر دیا گیا تھا۔ تعمیراتی کام کے سلسلے میں مکان کھولا گیا تو اندر مشکوک پریشر ککر موجود تھا۔ اطلاع ملنے پر ایس پی سٹی پشاور شاہد عدنان اور ایس ایچ او یکہ توت ریاض آفریدی کی نگرانی میں بم ڈسپوزل اسکواڈ نے کارروائی کی۔

پولیس حکام کے مطابق واقعے سے متعلق قانونی کارروائی کے لیے محکمہ انسدادِ دہشت گردی خیبرپختونخوا کو مراسلہ ارسال کردیا گیا ہے، جبکہ مزید تحقیقات جاری ہیں۔

انسپکٹر جنرل پولیس خیبرپختونخوا ذوالفقار حمید نے کارروائی میں حصہ لینے والی پولیس ٹیم اور بم ڈسپوزل اسکواڈ کی کارکردگی کو سراہتے ہوئے شہریوں کے تحفظ کے لیے پولیس کی کوششوں کو جاری رکھنے کے عزم کا اظہار کیا۔