پنجاب بھر میں سی ٹی ڈی کے آپریشنز، داعش اور ٹی ٹی پی کمانڈر سمیت 38 دہشت گرد گرفتار

لاہور (بیورو رپورٹ) کاؤنٹر ٹیررزم ڈیپارٹمنٹ (سی ٹی ڈی) پنجاب نے رواں ماہ صوبے کے مختلف شہروں میں مختلف آپریشنز میں 38 دہشت گردوں کو گرفتار کرلیا۔

ترجمان سی ٹی ڈی کے مطابق دہشت گردی کے خدشات کے پیش نظر سی ٹی ڈی کے پنجاب کے مختلف شہروں میں 449 انٹیلی جنس بیسڈ آپریشنز میں رواں ماہ کے دوران 38 دہشتگردوں کو گرفتار کیا گیا۔

ترجمان کے مطابق اس عرصے کے دوران لودھراں سے کالعدم تحریک طالبان پاکستان (ٹی ٹی پی) کا تربیت یافتہ دہشتگرد کمانڈر، بہاولپور سے داعش کا اہم کمانڈر بھی گرفتار کرلیا گیا، کارروائیاں لاہور، رحیم یار خان، نارووال، راولپنڈی، ملتان میں کی گئیں۔

حکام کے مطابق جھنگ، سرگودھا، خانیوال، وہاڑی، بہاولپور، لودھراں، بہاولنگر میں بھی انٹیلیجنس بیسڈ آپریشنز کئے گئے، دہشتگردوں سے دھماکا خیز مواد، ہینڈ گرنیڈ، اسلحہ، موبائل فون اور نقدی برآمد کر لیا گیا۔

ترجمان کے مطابق دہشت گردوں کی شناخت فہیم، وحید، سعود، طاہر، باچہ، شاہد، رحمان گل، شیر جان، عمر ایاز، سبحان وغیرہ کے نام سے ہوئی ہے۔

ترجمان کے مطابق دہشت گردوں سے دھماکہ خیز مواد، ہینڈ گرنیڈ، ڈیٹونیٹر 29، حفاظتی فیوز وائر 50 فٹ، گولیاں، اسلحہ، موبائل فون، نقدی اور دیگر سامان برآمد کر لئے۔

ترجمان کے مطابق گرفتار دہشت گرد قانون نافذ کرنے والے اداروں اور اہم تنصیبات پر حملے کی منصوبہ بندی کررہے تھے۔