پنجاب میں سی ٹی ڈی کی کارروائیاں، القاعدہ کے اہم کمانڈرز سمیت 8 دہشت گرد گرفتار

لاہور (بیورو رپورٹ) کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف اضلاع میں انٹیلی جنس بیسڈ آپریشن کے دوران 8 دہشت گردوں کو گرفتار کرلیا۔

تفصیلات کے مطابق کاؤنٹر ٹیررازم ڈیپارٹمنٹ (سی ٹی ڈی) نے پنجاب کے مختلف اضلاع میں کارروائیاں کی، کارروائیاں لاہور، راولپنڈی، گوجرانوالہ اور ملتان میں کی گئیں۔ لاہور سے القاعدہ کے 2 اہم کمانڈرز کاشان اور حسن گرفتار کرلیے گئے۔

ترجمان کے مطابق دیگر گرفتار دہشت گردوں کی شناخت لیاقت، حسن، کاشان، گل کریم، ایوب خان، امیر معاویہ اور رضوان کے نام سے ہوئی ہے۔

دہشت گردوں کے قبضے سے بارودی مواد، حفاظتی فیوز، ڈیٹو نیٹر، موبائل فون، اسلحہ اور نقدی برآمد کرکے ان کے خلاف مقدمات درج کر لئے اور تفتیش جاری ہے۔

رواں ہفتے 336 کومبنگ آپریشنز میں 135 مشتبہ افراد گرفتار کیے، کومبنگ آپریشنز میں 16784 افراد سےپوچھ کچھ کی گئی.

ترجمان کاکہنا ہے کہ سی ٹی ڈی محفوظ پنجاب کے ہدف پر عمل پیرا ہے، دہشت گردی کے ناسور کو جڑ سے اکھاڑ پھینکنے کے لیے پرعزم ہیں۔