چاغی : نجی کانوں سے اغوا کیے گئے تمام 7 افراد بحفاظت بازیاب

چاغی(ڈیلی اردو) بلوچستان کے شورش زدہ ضلع چاغی کے علاقے ماہیان کور میں نجی کانوں سے گزشتہ ماہ اغوا کیے گئے ساتوں افراد بحفاظت بازیاب ہوکر اپنے گھروں کو پہنچ گئے ہیں۔

ذرائع کے مطابق 10 اگست کو مسلح افراد نے ماہیان کور میں قائم نجی کانوں پر دھاوا بول کر وہاں موجود سات افراد کو اغوا کرلیا تھا۔ مغویوں میں تین افراد کا تعلق چاغی جبکہ چار کا تعلق گلگت سے تھا۔

ذرائع کا کہنا ہے کہ گلگت سے تعلق رکھنے والے مغویوں میں وجاہت، واجد، شاہد اور صابر شامل تھے، جبکہ چاغی کے ضیاء الدین، شاہ سلیم اور سعید محمد کو بھی مسلح افراد اپنے ساتھ لے گئے تھے۔

اطلاعات کے مطابق چاغی سے تعلق رکھنے والے تینوں افراد گزشتہ ہفتے بازیاب ہوکر اپنے گھروں کو پہنچ گئے تھے، جبکہ گلگت سے تعلق رکھنے والے چاروں مغوی بھی گزشتہ روز بحفاظت بازیاب ہوکر واپس پہنچ گئے۔

ساتوں افراد کی بحفاظت واپسی کے بعد ان کے اہلخانہ میں خوشی کی لہر دوڑ گئی ہے۔ تاہم مغویوں کو اغوا کرنے والے مسلح افراد اور واردات کے محرکات کے حوالے سے مزید تفصیلات سامنے نہیں آسکیں۔