چاغی: سکیورٹی چوکی پر حملہ ناکام، 12 دہشتگرد ہلاک

چاغی(ڈیلی اردو) بلوچستان کے شورش زدہ ضلع چاغی کے علاقے دالبندین میں سکیورٹی فورسز نے ایک چوکی پر کالعدم بلوچستان لبریشن آرمی (بی ایل اے) کے حملے کو پسپا کرنے کا دعویٰ کیا ہے، جوابی کارروائی میں 12 دہشتگرد ہلاک ہوگئے۔

ذرائع کے مطابق دہشتگردوں کے ایک گروپ نے سکیورٹی چوکی کو نشانہ بنانے کی کوشش کی، تاہم اہلکاروں نے بروقت کارروائی کرتے ہوئے حملہ آوروں کو آگے بڑھنے سے روک دیا۔ فائرنگ کے تبادلے میں 12 دہشتگرد مارے گئے۔

ذرائع کا کہنا ہے کہ ہلاک دہشتگردوں کے قبضے سے اسلحہ اور گولہ بارود بھی برآمد ہوا ہے۔ واقعے کے بعد سکیورٹی فورسز نے علاقے میں سرچ آپریشن کیا، جبکہ مزید تفصیلات اور ہلاک دہشتگردوں کی شناخت سامنے نہیں آسکی۔