ڈیرہ اسماعیل خان میں دفعہ 144 کیخلاف ورزی، پی ٹی ایم کے 26 رہنماؤں اور کارکنوں کیخلاف مقدمہ درج، 4 گرفتار

ڈیرہ اسماعیل خان (بیورو رپورٹ) ضلعی انتظامیہ ڈیرہ اسماعیل خان کی جانب سے جلسے جلوسوں پر پابندی کی خلاف ورزی کرنے پر پشتون تحفظ موومنٹ (پی ٹی ایم) کے 26 رہنماؤں اور کارکنوں کیخلاف مقدمہ درج کر کے 4 کارکنوں کو گرفتار کرلیا گیا۔

پولیس کے مطابق ضلعی انتظامیہ ڈیرہ کی جانب سے ضلع بھر میں جلسے جلوسوں کے انعقاد پر پابندی عائد کر کے دفعہ 144 لگائی گئی ہے لیکن پشتون تحفظ موومنٹ (پی ٹی ایم) کی جانب سے اس پابندی کی خلاف ورزی کر کے انڈس ہائی وے پر چودھوان موڑ کے مقام پر ریلی نکالی گئی اور حساس اداروں کے خلاف نعرے بازی بھی کی گئی۔

پروآ پولیس نے دفعہ 144 کی خلاف ورزی پر پی ٹی ایم کے سمیع اللہ، شعیب، ضیاء الرحمن اور عرفان سمیت 26 کارکنوں اور رہنماؤں کیخلاف مقدمہ درج کرکے 4 افراد کو گرفتار کرلیا ہے۔