ڈیرہ اسماعیل خان میں دومند چیک پوسٹ پر دہشت گردوں کا حملہ، 2 پولیس اہلکار زخمی

ڈی آئی خان (ڈیلی اردو) صوبہ خیبر پختونخوا کے ضلع ڈیرہ اسماعیل خان میں مغل کوٹ کے علاقہ دومند میں چیک پوسٹ پر دہشت گردوں کا حملہ ہوا ہے، جس میں دو پولیس اہلکار زخمی ہوئے ہیں۔

دومند چیک پوسٹ پر ہوئے حملے کے دوران تقریباً ڈیڑھ گھنٹہ پولیس اور دہشت گردوں کے درمیان فائرنگ کا تبادلہ جاری رہا۔

پولیس کی جوابی فائرنگ اور منہ توڑ جواب کے بعد دہشت گرد فرار ہونے پر مجبور ہوگئے۔

پولیس ذرائع کے زخمی پولیس اہلکاروں کی شناخت عالم اور احسان کے نام سے ہوئی ہے جنہیں تحصیل ہیڈ کوارٹر اسپتال منتقل کیا جا رہا ہے۔

دہشت گردوں کے حملے کے بعد ڈیرہ اسماعیل خان میں دفعہ 144 نافذ کردی گئی ہے۔

حکام کی جانب سے جاری نوٹیفکیشن کے مطابق ضلع میں اسلحہ کی نمائش اور موٹر سائیکل کی ڈبل سواری سمیت پانچ یا زائد لوگوں کے اجتماع پر پابندی ہوگی۔پابندی کا اطلاق 6 جنوری سے 14 جنوری تک ہوگا۔

یاد رہے گزشتہ روز ٹانک میں تھانہ گومل کی حدود میں پولیس او سیکیورٹی فورسز نے انٹیلی جنس بیسڈ آپریشن کیا تھا۔ آپریشن کے دوران ایک انتہائی مطلوب دہشت گرد کمانڈر ساتھی سمیت ہلاک ہوا تھا۔

پولیس کے مطابق دہشت گرد کے سر پر 25 لاکھ کا انعام تھا۔ دہشت گرد بھتہ خوری، ٹارگٹ کلنگ سمیت متعدد وارداتوں میں مطلوب تھا۔ ایک روز قبل بنوں میں بھی رات گئے تھانہ منڈان پر دہشت گردوں نے حملہ کیا تھا۔

پولیس کا کہنا ہے کہ پولیس اور دہشتگردوں کے مابین شدید فائرنگ کا تبادلہ ہوا تاہم پولیس کی جوابی کارروائی سے دہشتگرد فرار ہوگئے۔ حملے میں کوئی جانی نقصان نہیں ہوا تھا۔

واضح رہے کچھ روز قبل ڈیرہ اسماعیل خان کے علاقے درابن میں سیکیورٹی فورسز کی چیک پوسٹ پر دہشتگردوں کے حملے میں 23 فوجی ہلاک ہوگئے تھے، جوابی کارروائی میں 6 دہشتگردوں کو ہلاک کیا گیا تھا۔