ڈیرہ اسماعیل خان میں ہتھالہ پولیس اسٹیشن پر طالبان کا حملہ، ایک پولیس اہلکار ہلاک، 2 زخمی

ڈی آئی خان (بیورو رپورٹ) صوبہ خیبر پختونخوا کے ضلع ڈیرہ اسماعیل خان کی تحصیل کلاچی میں واقع ہتھالہ پولیس اسٹیشن پر طالبان کے حملے میں ایک پولیس اہلکار ہلاک اور 2 زخمی ہوگئے، پولیس حکام کا کہنا ہے کہ دہشتگردوں نے تھانہ ہتھالہ پر بھاری ہتھیاروں اور دستی بموں سے حملہ کیا۔

ڈیرہ اسماعیل خان کی تحصیل کلاچی میں ہتھالہ پولیس چوکی پر دہشت گردوں نے حملہ کردیا۔#Kulachi #DIKhan #Pakistan

— Shabbir Hussain Turi (@ShabbirTuri) October 8, 2023

پولیس حکام کے مطابق کلاچی میں واقع تھانہ ہتھالہ پر دہشتگردوں کے حملے میں ایک پولیس اہلکار ہلاک اور 2 زخمی ہوگئے۔

پولیس کے مطابق دہشتگردوں نے گزشتہ شب تھانے پر بھاری ہتھیاروں اور دستی بموں سے حملہ کیا، جس میں 2 پولیس اہلکار سعید، ممتاز اور وکیل زادہ شدید زخمی ہو گئے تھے، جنہیں فوری طور پر ڈسٹرکٹ ہسپتال ڈیرہ منتقل کیا گیا تھا۔

حکام نے بتایا کہ آج صبح ایک پولیس اہلکار وکیل زادہ دوران علاج زخموں کی تاب نہ لاتے ہوئے چل بسا، اہلکار کا تعلق ضلع بونیر سے تھا۔

حکام کے مطابق دہشتگردوں کے حملے میں تھانے کا مین گیٹ تباہ ہوگیا اور کافی دیر تک دو طرفہ فائرنگ کے بعد حملہ آور فرار ہونے میں کامیاب ہوگئے۔

دوسری جانب کالعدم تنظیم تحریک طالبان پاکستان نے پولیس اسٹیشن پر حملے کی ذمہ داری قبول کرلی۔

ترجمان ٹی ٹی پی محمد خراسانی نے دعویٰ کیا ہے کہ مجاہدین نے کلاچی میں پولیس اسٹیشن پر ہلکے اور بھاری ہتھیاروں (ہینڈ گرینیڈز، راکٹس اور لیزرگن) سے حملہ کیا جس کے نتیجے میں تین پولیس اہلکار ہلاک اور متعدد زخمی ہوئے جبکہ سیکیورٹی کیمرے بھی مکمل طور پر تباہ کردیئے گئے۔