کامیاب دورہ: امریکا نے پاکستان کے لئے بڑا اعلان کر دیا

واشنگٹن (ڈیلی اردو/ نیوز ایجنسی) امریکا نے پاکستان کے ایف 16طیاروں کیلئے  تکنیکی اور لاجسٹک سپورٹ کا اعلان کردیا، امریکا نے بھارت کے سی 17 طیاروں کیلئے 67 کروڑ ڈالرز کی تکنیکی امداد کا بھی اعلان کیا، امریکی محکمہ خارجہ نے کہا ہے کہ دونوں ممالک کے طیاروں کیلئے  تکنیکی اور لاجسٹک سپورٹ کے فیصلے سے جنوبی ایشیا میں طاقت کا توازن نہیں بگڑے گا۔

میڈیا رپورٹس  کے مطابق ایف 16 طیاروں کیلئے  ساڑھے 12کروڑ ڈالر کی سپورٹ فراہم کی جائے گی اور پاکستان کو ایف 16طیاروں کے پرزے اور فنی خدمات فراہم کی جائیں گی۔

پاکستان کو ایف 16طیاروں کی تکنیکی سپورٹ کا اعلان امریکا کی دفاعی سیکیورٹی تعاون ایجنسی نے کیا جبکہ تکنیکی و فنی سپورٹ کی منظوری امریکی محکمہ خارجہ نے دی۔

دوسری جانب امریکا نے بھارت کے سی 17طیاروں کیلئے  67کروڑ ڈالرز کی تکنیکی امداد کا بھی اعلان کیا ہے۔امریکی محکمہ خارجہ کی جانب سے جاری بیان میں کہا گیا  کہ دونوں ممالک کے طیاروں کیلئے  تکنیکی اور لاجسٹک سپورٹ کے فیصلے سے جنوبی ایشیا میں طاقت کا توازن نہیں بگڑے گا جبکہ اس فیصلے سے امریکی خارجہ پالیسی اورقومی سلامتی کو بھی فائدہ ہوگا۔