کراچی: اورنگی ٹاؤن میں مسجد کے پیش امام کی سحری کے وقت ہلاکت

کراچی (نمائندہ ڈیلی اردو) صوبہ سندھ کے صوبائی دارالحکومت کراچی کے علاقے اورنگی ٹاؤن کے مضافات میں واقع خیر آباد میں سحری کے وقت مسجد جانے والے پیش امام کو فائرنگ کرکے ہلاک کر دیا گیا۔ پولیس کے مطابق، مقتول شیراز زادہ جمیعت کے نائب امیر اور الطاف نگر کی مسجد کے پیش امام تھے اور نماز پڑھانے کے لیے جا رہے تھے کہ انہیں ٹارگٹ کر کے ہلاک کر دیا گیا۔

پولیس حکام نے بتایا کہ شیراز زادہ کے سر پر ایک گولی ماری گئی، جو ان کی ہلاکت کا سبب بنی۔ ان کے پاس سے موبائل فون برآمد ہوا ہے، اور اہل خانہ سے رابطے کی کوشش کی جارہی ہے۔

حکام کا کہنا ہے کہ اس ہلاکت کے معاملے کی مختلف زاویوں سے تحقیقات کی جارہی ہیں، اور یہ بھی دیکھا جا رہا ہے کہ مقتول کے ساتھ موبائل فون یا کوئی قیمتی چیز نہیں چھینی گئی، جس سے یہ سوال پیدا ہوتا ہے کہ آیا یہ واقعہ ٹارگٹ کلنگ یا کسی دشمنی کا نتیجہ تھا۔

پولیس نے مزید کہا کہ اس ہلاکت کی نوعیت پر غور کیا جا رہا ہے اور تحقیقات جاری ہیں تاکہ اس واقعے کے پس پردہ وجوہات کا پتہ چلایا جا سکے۔