کراچی ایئرپورٹ حملہ کیس: تحریک طالبان پاکستان کے مرکزی سہولت کار سمیت 4 ملزمان بری

کراچی (ڈیلی اردو) انسداد دہشت گردی کی خصوصی عدالت نے 6 سال بعد کراچی ایئرپورٹ حملہ کیس میں دہشت گردوں کی سہولت کاری کے ملزمان کو عدم ثبوت کی بنا پر بری کر دیا گیا۔

جاری کردہ فیصلے کے مطابق استغاثہ ملزمان پر کالعدم تحریک طالبان پاکستان کی سہولت کاری کا جرم ثابت کرنے میں ناکام رہا اور انسداد دہشت گردی کی خصوصی عدالت نے مقدمے میں نامزد مرکزی ملزم سرمد صدیقی سمیت 4 ملزمان کو بری کردیا۔

کراچی سینٹرل جیل میں انسداد دہشت گردی کمپلیکس میں خصوصی عدالت نے ایئر پورٹ حملہ کیس کا فیصلہ سنایا۔ جس کے مطابق استغاثہ ملزمان پر کالعدم تحریک طالبان پاکستان کے سہولت کاری کا جرم ثابت کرنے میں ناکام رہا۔

عدالت نے مقدمہ میں نامزد اے پی ایم ایل سندھ کے کنوینئر سرمد صدیقی سمیت 4 ملزمان کو بری کردیا۔

بری ہونے والے دیگر ملزمان میں ندیم عرف برگر، آصف ظہیر اور عبدالراشد شامل ہیں۔ عدالت نے حکم دیا کہ ملزمان کسی اور مقدمہ میں نامزد نہیں ہیں تو انہیں رہا کر دیا جائے۔

عدالت نے کالعدم تحریک طالبان پاکستان کے ملا فضل اللہ، ترجمان شاہد اللہ شاہد سمیت 8 مفرور ملزمان کے تاحیات وارنٹ گرفتاری جاری کردیے۔

پولیس کے مطابق 8 جون 2014 کو ایئر پورٹ پر 10 دہشت گردوں نے حملہ کیا جس میں سیکیورٹی اہلکار اور ائیر پورٹ ملازمین سمیت 27 افراد ہلاک ہوگئے تھے۔ مقابلے میں 10 دہشت گرد بھی مارے گئے تھے۔

واقعے کے بعد سرمد صدیقی و دیگر کو گرفتار کیا گیا۔ ملزمان پر دہشت گردوں کو لاجسٹک، اسلحہ اور فنڈ فراہم کرنے اور ان کی معاونت و سہولت کاری کا الزام عائد کیا گیا تھا۔