کراچی میں زکوٰۃ و عشر کمیٹی کے چیئرمین کی ٹارگٹ کلنگ

کراچی (ڈیلی اردو) صوبہ سندھ کے صوبائی حکومت کراچی کے علاقے نارتھ کراچی میں نامعلوم افراد کی فائرنگ سے گلبرگ ٹاؤن کی زکوٰۃ و عشر کمیٹی کے چیئرمین عبدالقیوم ہلاک ہوگئے۔

ایس ایس پی سینٹرل ذیشان صدیقی کے مطابق عبد القیوم سے ملزمان نے کوئی لوٹ مار نہیں کی بلکہ ٹارگٹ کر کے قریب سے اسے 2 گولیاں ماری ہیں۔

پولیس کے مطابق مقتول عبدالقیوم کی جیب سے وزیٹنگ کارڈ ملا ہے جس کے مطابق عبدالقیوم کا تعلق سٹی ڈسٹرکٹ گورنمنٹ کے فنانس ڈپارٹمنٹ سے تھا۔

پولیس نے بتایا کہ جائے وقوع سے شواہد جمع کیے جارہے ہیں۔ جائے وقوع کے اطراف سے سی سی ٹی وی کیمروں کی فوٹیج بھی حاصل کی جارہی ہے۔ دریں اثنا عبدالقیوم کا جسدِ خاکی پوسٹ مارٹم کے لیے ہسپتال منتقل کردیا گیا ہے۔

واضح رہے کہ محرم الحرام کے آغاز کے ساتھ ہی شہر میں ٹارگٹ کلنگ کے دو واقعات رونما ہوچکے ہیں۔ اس سے قبل کراچی کے علاقے کریم آباد کے قریب دہشت گردوں نے فائرنگ کرکے محکمہ انسداد دہشت گردی (سی ٹی ڈی) کے افسر ڈی ایس پی علی رضا کو ہلاک کیا۔

علی رضا بہادر پولیس افسر چوہدری اسلم کے قریبی ساتھی تھے، لیاری گینگ وار سمیت دہشتگردی کے خلاف آپریشن میں حصہ لے چکے تھے جب کہ سی ٹی ڈی سمیت مختلف تھانوں کے ایس ایچ او بھی تعینات رہ چکے تھے۔