کراچی میں مارے گئے شدت پسندوں کا ٹارگٹ 12 ربیع الاول تھا، ڈی آئی جی سی ٹی ڈی

کراچی (ڈیلی اردو) ڈی آئی جی سی ٹی ڈی آصف اعجاز شیخ کا کہنا ہے کہ کراچی کے علاقے جنجال گوٹھ میں ہفتہ کے روز سی ٹی ڈی کے ساتھ مقابلے میں ہلاک 2 مبینہ شدت پسندوں کی شناخت ہو گئی ہے۔

کراچی میں پریس کانفرنس کرتے ہوئے آصف اعجاز شیخ نے کہا کہ ہلاک شدت پسندوں کے نام ایمل شاہ اور عبداللہ تھے، مبینہ شدت پسندوں کا گروپ کوئٹہ میں مختلف کارروائیوں میں ملوث رہاہے۔

انہوں نے کہا کہ دہشتگرد کراچی میں دوچار مہینے سے مقیم تھے اوران کا تعلق کالعدم تنظیم داعش سے تھا، ملزموں نے پولیس پر دستی بم بھی پھینکا تھا۔

ان کا کہنا تھا شدت پسندوں کا پہلے تعلق کالعدم تحریک طالبان پاکستان (ٹی ٹی پی) سے تھا لیکن بعد میں داعش میں شامل ہوگئے تھے۔ وہ 12 ربیع الاول کی تقریبات کو نشانہ بنانا چاہتے تھے۔

انہوں نے کہا کہ اگرآپریشن بروقت نہیں کیا جاتا تو بڑا نقصان ہو سکتا تھا۔

پریس کانفرنس میں ایس ایس پی سی ٹی ڈی زبیر نذیر انچارج سی ٹی ڈی راجہ عمر خطاب اور مظہر مشوانی بھی شریک تھے۔

پولیس کے مطابق دہشت گرد کراچی میں دو چار مہینے سے مقیم تھے۔ انہوں نے آبادی کے اندر رہائش اختیار کر رکھی تھی یہی وجہ ہے کہ انسداد دہشت گردی فورس جب کارروائی کے لیے پہنچی تو خدشہ محسوس ہوا کہ آبادی کا جانی نقصان ہوگا۔

ڈی آئی جی کے مطابق اس خدشے کے پیش نظر پولیس بکتر بند گاڑی (اے پی سی) سے گھر کا دروازہ توڑ کر اندر داخل ہوئی۔

ملزموں نے پولیس پارٹی پر دستی بم بھی پھینکا اور فرار ہونے کی کوشش کی۔ مارے جانے والوں میں سے ایک پیچھے کے راستے سے نکلنے کی کوشش کر رہا تھا جبکہ دوسرا اندر سے فائرنگ کرتا رہا۔

پولیس کو یہ خدشہ بھی تھا کہ گھر کے اندر بارودی مواد ہوگا۔

ایمل شاہ دہشتگردوں کا سرغنہ تھا۔ یہ گروپ 2021 میں کوئٹہ میں سرینا ہوٹل دھماکے اور ایف سی کے ٹرک پر حملے میں ملوث تھا۔

یاد رہے کہ پولیس نے ہفتہ کو اعلان کیا تھا کہ سپر ہائی وے کے قریب سی ٹی ڈی اور شدت پسندوں کے درمیان مقابلے میں دو شدت پسند ہلاک جب کہ چار پولیس اہلکار زخمی ہو گئے ہیں۔