کرم: پانچ مغوی مزدور بازیاب، 3 دہشت گرد ہلاک

پاراچنار (نمائندہ ڈیلی اردو) صوبہ خیبر پختونخوا کے قبائلی ضلع کرم کے علاقے زاوہ میں فورسز نے کارروائی کر کے تین ہفتے قبل اغوا ہونے والے پانچ مزدوروں کو بازیاب کرالیا، کارروائی میں تین دہشت گرد مارے گئے۔

ڈی پی او ضلع کرم طاہر اقبال کے مطابق وسطی کرم علاقہ زاوہ میں فورسز نے کامیاب کاروائی کی جس میں پاک فوج فرنٹیئر کور اور پولیس نے حصہ لیا، کاروائی کے دوران تین ہفتے قبل اغوا ہونے والے پانچ مزدوروں کو بازیاب کرالیا گیا جو کہ ٹیلی فون ٹاور کی تنصیب کے وقت اغوا کر لئے گئے تھے۔

ڈی پی او نے بتایا کہ اغوا ہونے والے چھ مزدوروں میں سے ایک مزدور کو تین روز قبل دہشت گردوں نے قتل کر دیا تھا جبکہ کاروائی کے دوران گزشتہ روز کیپٹن باسط اور سپاہی بلال بھی ہلاک ہو گئے تھے۔

ڈی پی او طاہر اقبال کے مطابق کارروائی کے دوران تین دہشت گرد مارے گئے جبکہ علاقے میں فورسز کا آپریشن تاحال جاری ہے۔