کوئٹہ: جشن فتح پاکستان جلسے کیلئے آنے والی ریلی میں دھماکا، 2 افراد ہلاک، 11 زخمی

کوئٹہ (ڈیلی اردو) بلوچستان کے دارالحکومت کوئٹہ میں جشن فتح پاکستان جلسے میں شرکت کے لیے آنے والی ریلی کو دہشتگردی کا نشانہ بنایا گیا۔ سریاب روڈ پر ہونے والے بم حملے میں کم از کم دو افراد ہلاک جبکہ 11 زخمی ہوگئے ہیں۔

ڈپٹی کمشنر کوئٹہ مہراللہ بادینی نے حملے کی تصدیق کرتے ہوئے بتایا کہ واقعے کی تحقیقات کا آغاز کر دیا گیا ہے۔ حملہ پاکستان پیپلز پارٹی کے رہنما اور رکن بلوچستان اسمبلی علی مدد جتک کی قیادت میں نکالی گئی ریلی پر اس وقت کیا گیا جب وہ میر منیر مینگل روڈ کے قریب پہنچی۔

سول ہسپتال کوئٹہ کے ایم ایس ڈاکٹر عبدالہادی کاکڑ کے مطابق ایک شخص موقع پر ہی ہلاک ہوگیا جبکہ ایک شدید زخمی دوران علاج دم توڑ گیا۔ 12 زخمیوں کو ٹراما سینٹر منتقل کیا گیا جن میں سے دو کی حالت نازک بتائی گئی ہے۔

ڈپٹی کمشنر کا کہنا تھا کہ ابتدائی طور پر حملے میں دستی بم استعمال ہونے کی غیر مصدقہ اطلاعات موصول ہوئی ہیں، تاہم تحقیقات جاری ہیں۔

وزیراعلیٰ بلوچستان میر سرفراز بگٹی نے حملے کی شدید مذمت کرتے ہوئے کہا کہ عوامی قیادت پر حملے دراصل بلوچستان کے امن پر حملہ ہیں۔ اُنہوں نے اعلان کیا کہ امن دشمنوں کے خلاف سخت اور نتیجہ خیز کارروائی کی جائے گی۔

واضح رہے کہ جشن فتح پاکستان جلسہ حکومت بلوچستان کی جانب سے کوئٹہ کے ریلوے ہاکی گراؤنڈ میں منعقد کیا گیا تھا، جہاں سکیورٹی کے سخت انتظامات کیے گئے تھے۔ جلسے کے مقام کے اطراف کی سڑکیں کنٹینرز سے بند تھیں اور پولیس کی بھاری نفری تعینات کی گئی تھی۔